இராஜா முத்தையா மருத்துவக் கல்லூரியில் இனி அரசு கட்டணம் தான்..! தமிழக அரசு அரசாணை

தமிழக அரசின் உயர்கல்வித்துறையின் கீழ் இயங்கி வந்த சிதம்பரம் ராஜா முத்தையா மருத்துவக் கல்லூரி, பல் மருத்துவக் கல்லூரி சுகாதாரம் மற்றும் மக்கள் நல்வாழ்வுத்துறைக்கு ஒப்படைக்கப்படுவதாக தமிழக அரசு அரசாணை வெளியிட்டது. அதன் மூலம் ராஜா முத்தையா மருத்துவக் கல்லூரி அரசு பல்கலைக்கழகமாகவும், மருத்துவக் கல்லூரியாகவும், இயங்கிவருகின்றன.

மேலும், தமிழக அரசின் கீழ் செயல்படும் மருத்துவக் கல்லூரிக்கு இணையாக, இராஜா முத்தையா மருத்துவக் கல்லூரி மற்றும் பல்மருத்துவக் கல்லூரி அனைத்தும் செயல்படும் நிலைக்கு உருவாகின. ஆனால், அனைத்து வகைகளிலும் அது அரசு மருத்துவக் கல்லூரியாக செயல்பட்டு வரும் நிலையில் மருத்துவ படிப்புக்கான கட்டணம் மற்றும் பிற அரசு மருத்துவக் கல்லூரிகளை விட 30 மடங்கு அதிகமாக வசூலிக்கப்படுவதாக குற்றசாட்டுகள் எழுந்தன.

அதற்கு விளக்கம் அளித்த தமிழக அரசு, சுயநிதி அடிப்படையில் அந்த கல்லூரி செயல்படுவதால் அப்படி கட்டணம் வசூலிக்கப்படுவதாக கூறியது. இதனை ஏற்காத கல்லூரி மாணவர்களும், அரசியல் தலைவர்களும், '' இக்கல்லூரிகளில் தற்போது பயிலும் எம்.பி.பி.எஸ். , முதுநிலை மருத்துவம், பி.டி.எஸ். , முதுநிலை பல் மருத்துவ மாணவர்கள் அனைவருக்கும் தமிழக அரசின் இதர மருத்துவக் கல்லூரிகளில் வசூலிக்கும் கல்விக் கட்டணத்தை வசூலிப்பதற்கு உடனடியாக அரசாணை வெளியிட வேண்டும் என கோரிக்கை வைத்ததுடன், மாணவர்கள் தரப்பில் போராட்டங்களும் நடத்தப்பட்டு வந்தது.

திருவாரூரில் நாம் தமிழர் கட்சியின் பிரச்சார வாகனத்தை உடைத்த பாஜகவினர்..!

மேலும், கட்டணத்தை எதிர்த்து, மாணவர்கள் உச்ச நீதிமன்றத்தில் வழக்கு தொடுத்தனர். அந்த வழக்கை விசாரித்த உச்ச நீதிமன்ற நீதிபதிகள் கொண்ட அமர்வு கட்டணம் குறித்து நீதிமன்றம் முடிவெடுக்கும் வரை தனியார் கல்லூரிகளில் வசூலிக்கும் கட்டணத்தை மட்டுமே மாணவர்களிடம் வசூலிக்க வேண்டும் என இடைக்கால உத்தரவை பிறப்பித்தது.

இந்த நிலையில், உயர்கல்வித்துறையிலிருந்து, சுகாதாரத்துறைக்கு கல்லூரி நிர்வாகம் மாற்றப்பட்ட நிலையில், கல்விக் கட்டணத்தை தமிழக அரசு நிர்ணயித்துள்ளது. அது தொடர்பான அரசாணையில், எம்.பி.பி.எஸ் பாடப் பிரிவிற்கு ரூ.13,610-ம், பி.டி.எஸ் பாடப் பிரிவிற்கு ரூ.11,610-ம், பட்ட மேற்படிப்புகள் பாடப் பிரிவிற்கு ரூ.30,000-ம், பட்ட மேற்படிப்பு பட்டய பாடப் பிரிவிற்கு ரூ.20,000-ம், பி.எஸ்.சி. (செவிலியர்), இயன் முறை மருத்துவம் மற்றும் செயல்முறை மருத்துவம் ஆகிய பாடப் பிரிவிற்கு ரூ.5,000-ம் கல்விக் கட்டணமாக நிர்ணயித்து முதல்வர் பழனிசாமி ஆணையிட்டுள்ளார்.

மேலும், இக்கட்டணமானது தற்போது பயின்று வரும் மாணவர்களுக்கும் இனி வருங்காலங்களில் இக்கல்லூரியில் பயில உள்ள மாணவர்களுக்கும் பொருந்தும் எனவும் தெரிவிக்கப்பட்டுள்ளது.