முதல்வர் ஸ்டாலினுக்கு சென்ற ரிப்போர்ட்: டெண்டர் விவகாரம் - களத்தில் இறங்கி அதிரடி!

“மக்களவைத் தேர்தலுக்கு இன்னும் ஒரு ஆண்டு காலமே உள்ள நிலையில் பாஜக அரசு ஒவ்வொரு மாநிலத்திலும் பிராந்திய கட்சிகளுக்கு என்னென்ன நெருக்கடிகளை கொடுக்கலாம் என்று பார்த்து வருகிறது. டெல்லி, பீகார், தெலங்கானா, மேற்கு வங்கம் உள்ளிட்ட மாநிலங்களில் பாஜகவை எதிர்த்து வரும் அரசுகளுக்கு நெருக்கடி கொடுக்கும் வகையில் முக்கிய அமைச்சர்கள், துணை முதல்வர்கள், முதல்வர்களின் குடும்ப உறுப்பினர்கள் என பலரும் விசாரணை வளையத்துக்குள் கொண்டு வரப்பட்டுள்ளனர்.

தமிழ்நாட்டிலும் எப்போது வேண்டுமென்றாலும் தனது ஏஜென்சிகளை பாஜக அரசு களமிறக்கலாம் எனும் நிலையில் உஷாராக இருக்க முதல்வர் தரப்பிலிருந்து எச்சரிக்கை போயுள்ளது. சமீபத்தில் நடைபெற்ற ஜி ஸ்கொயர் நிறுவன ரெய்டின் போது முதல்வர் மருமகன் பெயர் சபரீசன் பெயர் முணுமுணுக்கப்பட்டது. பாஜக அண்ணாமலையும் ஏதேனும் ஊழல் புகார் சிக்குமா என எதிர்பார்த்துள்ளார். எனவே இப்படியான நேரத்தில் டெண்டர் விஷயத்தில் எந்த தவறும் நடந்துவிடக்கூடாது என்பதில் திமுக மேலிடம் கவனமாக இருக்கிறது.

பிடிஆர் ஆடியோ விவகாரம் பொதுமக்கள் மத்தியில் பெரியளவில் பேசுபொருளாகாவிட்டாலும், அவரது துறை மாற்றம் அந்த விவகாரத்தை உயிர்ப்புடன் வைத்துள்ளது. இதனால் தமிழக அரசுக்கு இரண்டு ஆண்டுகளில் இல்லாத அளவு அதிருப்தி கடந்த ஓரிரு வாரங்களில் உருவாகியுள்ளது. இதுபோன்ற அதிருப்திகள் அதிகமாவது நல்லதல்ல. தேர்தலுக்கு குறைவான காலமே உள்ள நிலையில் அந்த சமயம் அதிருப்தி உருவானால், செய்த எந்த நன்மைகளும் மக்கள் மனதில் நிற்காது, புகார்கள் மட்டுமே பேசுபொருளாகும் என்பதை முதல்வர் தரப்பு உணர்ந்துள்ளது.

​திமுகவில் இன்னொரு அமைச்சருக்கு சிக்கல்: பாஜக கையில் அடுத்த ஆடியோ?​

முதல்வர் டெண்டர் விஷயத்தில் கடுமைகாட்டுவதால் அதிகாரிகள் மிகக் குறைவான விலைக்கு டெண்டர் முடிப்பதில் கவனமாக இருக்கின்றனர், இதனால் பல கோடி ரூபாய் மிச்சமாகிறது” என்கிறார்கள் கோட்டை வட்டாரத்தில்.