துரைமுருகன், எடப்பாடி பழனிச்சாமி மருத்துவமனையில் செக்-அப்!

திமுக பொருளாளர் துரைமுருகன் உடல் நலக்குறைவு காரணமாக சென்னை அப்போலோ மருத்துவமனையில் அனுமதிக்கப்பட்டுள்ளார்.

திமுக பொருளாளர் துரைமுருகன், காய்ச்சல் காரணமாக சென்னை ஆயிரம் விளக்கு கிரீம்ஸ் சாலையில் உள்ள அப்போலோ மருத்துவமனையில் அனுமதிமதிக்கப்பட்டு தீவிர சிகச்சை பெற்று வருகிறார். இன்று மதியம் வீடு திரும்புவார் எனவும் தகவல் வெளியாகி உள்ளது.

துரைமுருகன் ஏற்கெனவே, கடந்த ஜனவரி மாதம் நெஞ்சுவலி காரணமாக அப்போலோ மருத்துவமனையில் அனுமதிக்கப்பட்டிருந்தார். தொடர்ந்து தேர்தல் முடிவுகள் வெளியான கடந்த மே மாதம் 23-ம் தேதி, காய்ச்சல் மற்றும் சிறுநீரக தொற்று காரணமாக அப்பலோ மருத்துவமனையில் அனுமதிக்கப்பட்டு சிகிச்சை மேற்கொண்டார்.

நேற்றுகூட தமிழகத்தில் நிலவும் தண்ணீர் தட்டுப்பாடு குறித்து அதிமுக அரசை குறை கூறி துரைமுருகன் செய்தியாளர்களிடம் பேசினார். குறைந்த காலத்தில் 3வது முறையாக துரைமுருகன் உடல் நல பாதிப்புக்குள்ளாகி மருத்துவமனையில் அனுமதிக்கப்பட்டிருப்பதால் திமுகவினர் சோகமடைந்துள்ளனர்.

இதேபோல் தமிழக முதல்வர் எடப்பாடி பழனிச்சாமியும் வழக்கமான சிகிச்சைக்காக சென்னை அப்பலோ மருத்துவமனையில் அனுமதிக்கப்பட்டுள்ளார். ஒரே நாளில் இரு முக்கிய தலைவர்கள் அப்பலோ மருத்துவமனையில் அனுமதிக்கப்பட்டதால் அப்பகுதி சற்று பரபரப்புடன் காணப்படுகிறது.