உள்ளாட்சித் தேர்தல்: திமுக கூட்டணியில் காங்கிரஸுக்கு எத்தனை இடங்கள்?

கடந்த ஆண்டு தமிழகத்தின் 9 மாவட்டங்களில் ஊரக உள்ளாட்சித் தேர்தல் நடைபெற்றது. இதில் மிகப் பெரும்பாலான இடங்களில் திமுகவும் அதன் கூட்டணிக் கட்சிகளும் வெற்றி பெற்றன.

இந்த ஆண்டு தமிழகத்தில் உள்ள 21 மாநகராட்சி, 138 நகராட்சி மற்றும் 490 பேரூராட்சி என மொத்தம் 649 நகர்ப்புற அமைப்புகளுக்குத் தேர்தல் நடத்த தமிழக அரசு திட்டமிட்டுள்ளது.

உச்ச நீதிமன்றம் நகர்ப்புற உள்ளாட்சித் தேர்தலை நடத்த வேண்டும் என உத்தரவிட்டுள்ள நிலையில் கொரோனா காரணமாக தேர்தலை தள்ளி வைக்க சென்னை உயர் நீதிமன்றத்தில் வழக்குகள் தொடரப்பட்டுள்ளன. இந்த வழக்கு விசாரணை இன்று நடைபெற உள்ளது.
முழு ஊரடங்கால் இவ்வளவு பாதிப்பா? 400 ஆம்னி பேருந்துகள் நிறுத்தம்!
இன்னும் சில தினங்களில் தேர்தல் தேதி அறிவிக்கப்பட வாய்ப்புள்ளதாக கூறப்படுகிறது. இந்நிலையில் அனைத்து கட்சிகளும் தேர்தலை எதிர்நோக்கி அதற்கான வேலைகளில் மும்முரமாக இறங்கியுள்ளன. பெரும்பாலும் உள்ளாட்சித் தேர்தலில் கூட்டணி தொகுதிப் பங்கீடு என்பது கட்சியின் தலைமையிடத்தில் நடைபெறுவதில்லை. அந்தந்த மாவட்ட அளவிலேயே கூட்டணிக் கட்சிகள் இடங்களை பங்கிட்டுக் கொள்கின்றன.

தி.மு.கவின் கூட்டணிக் கட்சியான தமிழ்நாடு காங்கிரஸ் கட்சி தரப்பிலிருந்து நகர்ப்புற உள்ளாட்சித் தேர்தல் பணிகள் குறித்து அக்கட்சியின் தலைவர் கே.எஸ்.அழகிரி பேசியுள்ளார்.

அதில், “நகர்ப்புற உள்ளாட்சித் தேர்தலில் போட்டியிடுவதற்காக காங்கிரஸ் கட்சியில் இதுவரை 15 ஆயிரம் பேர் விருப்ப மனு அளித்துள்ளனர். தேர்தல் தேதி அறிவித்தவுடன் தி.மு.க-வுடன் பேச்சுவார்த்தை நடத்தி தங்களுக்கான இடங்களைக் கேட்டு பெறுவோம்" என கே.எஸ்.அழகிரி கூறியுள்ளார்.
பள்ளி ஆசிரியர்களுக்கு பணியிட மாறுதல்: இன்று முதல் தொடக்கம்!
மேலும் தி.மு.க உடனான பேச்சுவார்த்தைக்கு முன்பு காங்கிரஸ் கட்சியின் மாவட்டத் தலைவர்களுடன் ஆலோசனை நடத்தி அவர்களின் கருத்துகளையும் கேட்க உள்ளதாகவும் கே.எஸ்.அழகிரி கூறியுள்ளார்.

கடந்த ஆண்டு 9 மாவட்டங்களில் நடைபெற்ற ஊரக உள்ளாட்சித் தேர்தலில் தி.மு.க தலைமையிலான கூட்டணி 74 ஊராட்சி ஒன்றியங்களில் 73 இடங்களும், 140 மாவட்ட ஊராட்சிகளில் 138 இடங்களும் பெற்று மிகப் பெரிய வெற்றி பெற்றது குறிப்பிடத்தக்கது.