மு.க.ஸ்டாலின் பிறந்தநாளை முன்னிட்டு கிரிக்கெட் போட்டி: இளைஞரணி ஏற்பாடு

சென்னை: திமுக தலைவர் மு.க.ஸ்டாலின் பிறந்தநாளை முன்னிட்டு மாநில அளவில் மிகப்பெரிய அளவில் கிரிக்கெட் போட்டி நடத்தப்படும் என அக்கட்சியின் இளைஞரணி செயலாளர் உதயநிதி ஸ்டாலின் தெரிவித்துள்ளார்.

திமுக இளைஞரணி மாவட்ட, மாநகர அமைப்பாளர்கள் கூட்டம் அக்கட்சியின் இளைஞரணி செயலாளர் உதயநிதி ஸ்டாலின் தலைமையில் சென்னை அன்பகத்தில் நடைபெற்றது. அதன் பின்னர் செய்தியாளர்களை சந்தித்த உதயநிதி ஸ்டாலின், “இளைஞரணி உறுப்பினர் சேர்க்கைக்கான இலக்கு 30 லட்சமாக நிர்ணயித்திருந்தோம். அதனை அடைந்த பட்சத்தில் திமுக தலைவர் அறிவுறுத்தியதன் பேரில் 50 லட்சமாக நிர்ணாயிக்கப்பட்டுள்ளது. அதற்காக பணியாற்றிக் கொண்டிருக்கிறோம் என்றார்.

மேலும், திமுக தலைவர் மு.க.ஸ்டாலின் பிறந்தநாளை முன்னிட்டு மாநில அளவில் மிகப்பெரிய அளவில் கிரிக்கெட் போட்டி நடத்தவிருக்கிறோம் எனவும் உதயநிதி தெரிவித்துள்ளார். திமுக தலைவர் மு.க.ஸ்டாலினுக்கு மார்ச் 1ஆம் தேதி பிறந்தநாள். ஒவ்வொரு ஆண்டும் அவரது பிறந்தநாளை இளைஞர் எழுச்சி தினமாக திமுகவினர் கொண்டாடி வருகின்றனர். அன்றைய தினம் கட்சித் தொண்டர்கள், மூத்த தலைவர்களை அவரை சந்தித்து வாழ்த்து தெரிவிப்பர்.

உடன் பிறப்பின் உருக்கம்.... மாஸ்டரானார் தளபதி மு.க.ஸ்டாலின்!

முன்னதாக, திமுக தலைவராக இருந்த கலைஞர் கருணாநிதி கடந்த 2018ஆம் ஆண்டு ஆகஸ்ட் மாதம் காலமானார். அதன் பின்னர் அக்கட்சியின் தலைவராக மு.க.ஸ்டாலின் பொறுப்பேற்றார். தொடர்ந்து கடந்த ஆண்டு மார்ச் 1ஆம் தேதியன்று தனது பிறந்த நாள் கொண்டாட்டத்தை கலைஞர் நினைவாக மு.க.ஸ்டாலின் தவிர்த்து விட்டார் என்பது குறிப்பிடத்தக்கது.