தினகரன் வழக்கில் திடீர் திருப்பம்: மன்னார்குடியை சேர்ந்தவரிடம் டெல்லி போலிஸ் விசாரணை..!

இரட்டை இலை சின்னத்தை பெற லஞ்சம் கொடுக்க முயன்ற வழக்கில் மன்னார்குடியைச் சேர்ந்த ஓய்வு பெற்ற அரசுப் பொறியாளரிடம் டெல்லி காவல்துறையினர் விசாரணை நடத்தி வருகின்றனர்.

இரட்டை இலை சின்னத்தை பெற சுகேஷ் சந்திரா என்ற இடைத்தரகர் மூலம், தேர்தல் ஆணைய அதிகாரிகளுக்கு லஞ்சம் கொடுக்க முயன்றதாக டிடிவி தினகரன் மற்றும் அவரது நண்பர் மல்லிகார்ஜுனா ஆகியோர் டெல்லி காவல்துறையினரால் கைது செய்யப்பட்டனர்.

இருவரையும் நீதிமன்ற காவலில் எடுத்த டெல்லி காவல்துறையினர், நேற்று சென்னைக்கு அழைத்து வந்து விசாரணை நடத்தி வருகின்றனர். இந்நிலையில் முக்கிய திருப்பமாக, டிடிவி தினகரனுக்கு ஹவாலா பண ஏஜெண்டாக செயல்பட்டதாக கூறப்படும் குற்றச்சாட்டில் நரேஷ் என்ற நபர் இன்று காலை கைது செய்யப்பட்டார்.

இந்நிலையில் அடுத்த அதிரடி திருப்பமாக, சென்னை ஆதம்பாக்கத்தில் வகித்து வரும் மன்னார்குடியை பூர்வீகமாகக் கொண்ட ஓய்வு பெற்ற பொதுப்பணித்துறை பொறியாளர் மோகன் என்பவரிடம் , டெல்லி காவல்துறையினர் விசாரணை நடத்தினர். டிடிவி தினகரனின் மீது சுமத்தப்பட்ட குற்றச்சாட்டில் இவருக்கும் பங்கிருக்கலாம் என கூறப்படுகிறது.

இதனைத் தொடர்ந்து ஆதம்பாக்கத்தில் இருந்து கொளப்பாக்கம் பகுதிக்கு டெல்லி காவல்துறையினர் சென்றனர். அந்த பகுதியிலும் இந்த வழக்கில் சம்மந்தப்பட்டவர் எனக் கூறப்படும் வோடபோன் நிறுவன மேலாளரான பிலிப் டேனியல் என்பவரையும் டெல்லி காவல்துறையினர் சந்தித்தனர். இந்நிலையில் இவர்கள் இருவருக்கும், நேரில் வந்து ஆஜராக, டெல்லி போலிசார் சம்மன் அளித்துள்ளது தற்போது தெரியவந்துள்ளது.

இப்படியாக, இன்று காலை முதல் இந்த வழக்கில் சம்மந்தப்பட்டவர்கள் சங்கிலித் தொடராக விசாரணை செய்யப்படுவதால், இன்னும் பல அதிரடி திருப்பங்களை எதிர்பார்க்கலாம் என காவல்துறை வட்டாரங்கள் தெரிவிக்கின்றன.

Delhi crime police investicate retired PWD engineer in TTV Dinakaran case