கோவையில் மீண்டும் பரபரப்பு; ரூ.60 லட்சம் மதிப்பிலான பழைய ரூ.1000 நோட்டுகள் பறிமுதல்!

கோவை: பழைய ரூ.1000 நோட்டுகள் லட்சக்கணக்கில் சிக்கியதால் பரபரப்பு ஏற்பட்டுள்ளது.

கோவை பீளமேட்டில் தனியார் சர்வீஸ் அப்பார்ட்மெண்டில் உள்ள குடியிருப்பில் தஸ்தகீர் என்பவர் வாடகைக்கு தங்கியுள்ளார். அவரிடம் வாடகை வசூலிப்பதற்காக, இன்று காலை வெங்கடேஷ் என்பவர் சென்றுள்ளார்.

ஆனால் தஸ்தகீர் இல்லை. அப்போது கட்டு கட்டாக ரூ.1000 நோட்டுகள் இருப்பதைக் கண்டுள்ளார். உடனே பீளமேடு போலீசில் வெங்கடேஷ் புகார் அளித்தார்.

சம்பவ இடத்திற்கு விரைந்த போலீசார், ரூ.60 லட்சம் மதிப்பிலான பழைய ரூ.1000 நோட்டுகளை பறிமுதல் செய்தனர். மேலும் தஸ்தகீரின் காரும் பறிமுதல் செய்யப்பட்டது.

இதுதொடர்பான விசாரணையில், அப்பார்ட்மெண்ட் காவலர் பல்வேறு புகார்கள் தெரிவித்துள்ளார். இந்நிலையில் மாயமான தஸ்தகீரை, போலீசார் தீவிரமாக தேடி வருகின்றனர்.

தஸ்தகீர் கோவை மாவட்டத்தைச் சேர்ந்தவர் என்று தெரியவந்துள்ளது. கோவையில் கடந்த வாரம் கள்ள நோட்டுகள் சிக்கியது குறிப்பிடத்தக்கது.

Demonitized Rs.1000 notes seized in Coimbatore.