யார் அந்த வில்சன்? 6 அடியை பெற்றுக் கொடுத்த ”வின்”சனுக்கு திமுக இப்படியொரு மரியாதை!

வரும் 18ஆம் தேதி தமிழகத்திற்கான ராஜ்ய சபா எம்.பிக்களை தேர்வு செய்ய தேர்தல் நடைபெறுகிறது. மொத்தமுள்ள 6 சீட்களில் அதிமுக, திமுக வசம் தலா 3 சீட்கள் இருக்கின்றன.

திமுகவைப் பொறுத்தவரை கூட்டணி உடன்படிக்கையின்படி, மதிமுகவிற்கு ஒரு ராஜ்ய சபா சீட் வழங்கியுள்ளது. மீதமுள்ள இரண்டு சீட்கள் யாருக்கு வழங்கப்படும் என்று கேள்வி எழுந்தது.

இந்நிலையில் தற்போது ராஜ்ய சபா எம்.பி சீட்டிற்கு போட்டியிட உள்ள இருவர் குறித்து விவரங்களை வெளியிட்டுள்ளது. அதன்படி, முன்னாள் கூடுதல் அட்வகேட் ஜெனரல் பி.வில்சன்(53), திமுகவின் தொழிலாளர் சங்க பொதுச் செயலாளர் எம்.சண்முகம் ஆகியோருக்கு வாய்ப்பு அளிக்கப்பட்டுள்ளது.

இவங்க தான் அந்த மூணு பேரா? திமுக கூட்டணியில் இருந்து எம்.பியாக ராஜ்ய சபா எண்ட்ரி!

இவர்களில் மூத்த வழக்கறிஞராக இருக்கும் வில்சன், மறைந்த திமுக தலைவர் கருணாநிதியின் நன்மதிப்பை பெற்றவர். பல்வேறு வழக்குகளில் திமுகவிற்கு வெற்றி தேடி தந்துள்ளார். இதன் காரணமாக வில்சனை, “வின்”சன் என்று கருணாநிதி அன்போடு அழைப்பார்.

கடைசியாக கருணாநிதி மறைந்த பிறகு, அவரது உடலை அடக்கம் செய்ய மெரினாவில் இடம் ஒதுக்க அரசு மறுத்துவிட்டது. இதுதொடர்பாக உயர்நீதிமன்றத்தில் வழக்கு தொடரப்பட்டது.

அதில், 5 முறை தமிழ்நாட்டின் முதல்வராகவும், தமிழினத்தின் தலைவராகவும் இருந்த கருணாநிதிக்கு இடம் வழங்க வேண்டும் என்று வில்சன் வாதாடினார். மேலும் தனது ஆசான் அறிஞர் அண்ணாவின் கல்லறைக்கு அருகே இடம் ஒதுக்க வேண்டும் என்றும் கடுமையான வாதத்தை முன்வைத்து வாதாடி திமுகவிற்கு வெற்றி தேடி தந்தார்.

இதேபோல் மு.க.ஸ்டாலின், கனிமொழி, தயாநிதி மாறன் ஆகியோருக்கு பல்வேறு வழக்குகளில் வில்சன் வெற்றிகரமாக முடிவைப் பெற்று தந்தார். இதற்கு மரியாதை செலுத்தும் வகையில், தற்போது வில்சனுக்கு ராஜ்ய சபா பதவியை திமுக வழங்கியுள்ளது.