தூத்துக்குடி துப்பாக்கிச் சூட்டை கண்டித்து திமுகவின் பிரத்யேக வீடியோ

ஸ்டெர்லைட்டுக்கு எதிராக போராட்டம் நடத்தியவர்கள் மீது நடத்தப்பட்ட துப்பாக்கிச் சூடு சம்பவத்தை கண்டித்து திமுகவின் தொழில்நுட்ப பிரிவு பிரத்யேகமாக வீடியோ வெளியிட்டுள்ளது.


தூத்துக்குடியில் இயங்கி வரும் வேதாந்த குழுமத்தின் ஸ்டெர்லைட் ஆலைக்கு எதிராக நடத்தப்பட்ட மாபெரும் நூறாவது நாள் போராட்டத்தில் காவல்துறையினர் துப்பாக்கி சூடு நடத்தினர். நாடு முழுவதும் பெரும் அதிர்வலையை ஏற்படுத்திய இந்த சம்பவத்தில் 13 பேர் பரிதாபமாக உயிரிழந்தனர். போலீசார் நடத்திய இந்த துப்பாக்கிச் சூட்டை கண்டித்து தமிழகம் முழுவதும் பல்வேறு தரப்பினர் போராட்டம் நடத்தியும், வணிகர்கள் சங்கத்தினர் முழு கடையடைப்பும் நடத்தி வருகின்றனர். வேதாந்த குழுமத்தின் தலைவர் அனில் அகர்வால் தூத்துக்குடி சம்பவத்துக்கு வருத்தம் தெரிவித்தார்.


இந்நிலையில், தற்போது திமுகவின் தொழில்நுட்ப பிரிவு தனது டுவிட்டர் பக்கத்தில் வீடியோ ஒன்றை வெளியிட்டுள்ளது. அதில், துப்பாக்கிச் சூடு நடத்துவதற்கு உத்தரவிட்டது யார்? நிர்மலா தேவி விவகாரத்தில் உடனடியாக தலையிட்ட கவர்னர், இந்த சம்பவத்தில் ஏன் தலையிடவில்லை? என்று கேள்வி எழுப்பியுள்ளது. ஏற்கனவே, துப்பாக்கிச் சூடு சம்பவத்துக்கு எதிராக ஆர்ப்பாட்டம் நடத்திய ஸ்டாலின், துரைமுருகன் உள்ளிட்ட திமுகவினர் இரண்டாவது நாளாக கைது செய்யப்பட்டிருப்பது குறிப்பிடத்தக்கது.