ஜனவரியில் இந்த தேதியில்தான் ரஜினி கட்சி தொடங்குகிறாரா?

நீண்ட இழுபறிகள், பல்வேறு முரணான பேச்சுகளுக்கு இடையே, ஜனவரியில் கட்சித் துவங்கப்போவதாகவும், அதன் தேதியை டிசம்பர் 31ஆம் தேதி அறிவிக்கப்போவதாகவும் நடிகர் ரஜினிகாந்த் அறிவித்துள்ளார். ரஜினியின் அரசியல் வருகை குறித்த திட்டவட்ட அறிவிப்பால் அவரது ரசிகர்கள் மகிழ்ச்சியடைந்துள்ளனர். அவரது அரசியல் வருகையை பல்வேறு அரசியல் கட்சித் தலைவர்களும் வரவேற்றுள்ளனர்.

இதனைத்தொடர்ந்து, கட்சி பணிகளுக்கான வேலைகளை ரஜினி முடுக்கி விட்டுள்ளார். மேலும், ரஜினி தொடங்கவுள்ள கட்சியின் பெயர் என்னவாக இருக்கும், சின்னம் என்னவாக இருக்கும் என்ற விவாதங்கள் கிளம்பியுள்ளதற்கிடையே, அங்கீகாரம் இல்லாத கட்சிகளுக்கு தேர்தல் ஆணையம் சின்னங்களை ஒதுக்கியது. அதில், இடம் பெற்றுள்ள மக்கள் சேவை கட்சி ரஜினியுடையதுதான் என்றும், அதற்கு ஒதுக்கப்பட்டுள்ள ஆட்டோ சின்னமும் அவரது கட்சிக்குத்தான் என்ற விஷயங்கள் அரசியல் அரங்கில் பேசுபொருளாகியது.

இந்த நிலையில், ஜனவரியில் கட்சி தொடங்கவிருக்கும் தேதியை டிசம்பர் 31ஆம் தேதி அறிவிக்கவிருக்கும் ரஜினி, ஜனவரி மாதத்தில் எந்த தேதியை அறிவிப்பார் என்ற தகவல்கள் வெளியாகியுள்ளன. அதன்படி, எம்ஜிஆர் பிறந்தநாளான ஜனவரி 17ஆம் தேதி ரஜினி கட்சி ஆரம்பிப்பார் என்று தெரிகிறது.

கன்னட மொழி கற்று செடி வளர்த்த சசிகலா: நாளை விடுதலையாகிறார் சுதாகரன்!

முன்னதாக, 2018ஆம் ஆண்டு எம்ஜிஆர் நிகர்நிலை பல்கலைக்கழகத்தில் எம்ஜிஆரின் சிலையை திறந்து வைத்த ரஜினி, “எம்ஜிஆர் ஆகப்போகிறேன் என்று சொன்னால் அது பைத்தியக்காரத்தனம். ஆனால், எம்ஜிஆர் கொடுத்த நல்லாட்சியை ஏழை, எளிய மக்களுக்கு என்னால் கொடுக்க முடியும் என நம்புகிறேன்” என்று தெரிவித்திருந்தார்.

தமிழகத்தில் சட்டமன்ற தேர்தல் விரைவாக நடைபெறவுள்ள நிலையில், பிரசாரக் கூட்டங்களில் மறைந்த அதிமுக நிறுவனர் எம்ஜிஆர் பற்றிய பேச்சுகள் அதிகரிக்கத் தொடங்கியுள்ளன. அந்த வகையில், எம்ஜிஆரின் நீட்சிதான் நான் என்றும், அவரது மடியில் வளர்ந்தவர் நான் என்றும் மக்கள் நீதி மய்யம் கட்சித் தலைவர் கமல்ஹாசன் தெரிவித்தது கவனிக்கத்தக்கது.