வி.ஜி.என். நிறுவனத்தின் ரூ.115 கோடி சொத்து முடக்கம்

சென்னை: வி.ஜி.என். ரியல் எஸ்டேட் நிறுவனத்தின் ரூ.115 கோடி மதிப்பிலான சொத்தை அமலாக்கத்துறை முடக்கியுள்ளது.

விஜிஎன் டெவலப்பர்ஸ் ரியல் எஸ்டேட் நிறுவனம் சென்னை நுங்கம்பாக்கம் வாலஸ் கார்டனில் இயங்கி வருகிறது. இந்த நிறுவனம் கடந்த 2017ஆம் ஆண்டு கிண்டியில் ரூ.272 கோடிக்கு 10.46 ஏக்கர் நிலத்தை வாங்கியது.

இந்துஸ்தான் டெலிபிரிண்டர்ஸ் நிறுவனம், ஸ்டேட் வங்கியில் கடன் பெற அடமானம் வைத்திருந்து கடனைத் திரும்பிச் செலுத்தாத நிலையில் அந்த நிலத்தை விஜிஎன் டெவலப்பர்ஸ் நிறுவனத்திடம் விற்றுவிட்டது என்று ஸ்டேட் வங்கி சிபிஐயில் புகார் அளித்தது.

ரூ.387 கோடி மதிப்பிலான அந்த நிலத்தை ரூ.272 கோடிக்கு இந்துஸ்தான் டெலிபிரிண்டர்ஸ் நிறுவனம் விஜிஎன் டெவலப்பர்ஸ் நிறுவனத்திடம் விற்றிருக்கிறது. இதனால் ரூ.115 கோடி நஷ்டம் ஏற்பட்டுள்ளது என்றும் ஸ்டேட் வங்கி முறையிட்டது.

இது தொடர்பாக வழக்குப் பதிவு செய்து விசாரணை நடைபெற்று வந்த நிலையில் சனிக்கிழமை அமலாக்கத்துறை விஜிஎன் நிறுவனத்தின் ரூ.115 மதிப்பிலான அடுக்குமாடி குடியிருப்பை முடக்கியுள்ளது. முறைகேடாக வாங்கப்பட்ட நிலத்தில் அந்த குடியிருப்பு கட்டப்பட்டிருக்கிறது என்பது குறிப்பிடத்தக்கது.