ஒற்றைத் தலைமை!
ஒருங்கிணைப்பாளர் ஓ.பன்னீர்செல்வம், இணை ஒருங்கிணைப்பாளர் எடப்பாடி பழனிசாமி ஆகியோர் வழிகாட்டுதல் அடிப்படையில், நான்கு ஆண்டுகள் பயணித்த அஇஅதிமுகவில், தற்போது ஒற்றைத் தலைமை விவகாரம் விஸ்வரூபம் எடுத்துள்ளது. ஒற்றைத் தலைமைப் பதவியில், எடப்பாடி பழனிசாமியை அமர வைக்க, அவரது ஆதரவாளர்கள் தீவிர முயற்சியில் களமிறங்கி உள்ளனர்.
ஓ.பன்னீர்செல்வம் எதிர்ப்பு!
ஒற்றைத் தலைமை முழக்கத்திற்கு, ஒருங்கிணைப்பாளர் ஓ.பன்னீர்செல்வம் கடும் எதிர்ப்புத் தெரிவித்து வருகிறார். மேலும், எடப்பாடி பழனிசாமி தரப்பு எடுக்கும் அனைத்து நடவடிக்கைகளுக்கும் தேர்தல் ஆணையம் மற்றும் நீதிமன்றம் மூலம் முட்டுக்கட்டை போட, ஓ.பன்னீர்செல்வம் தரப்பினர் திட்டமிட்டு உள்ளனர்.
ஜூலை 11ல் முடிவு?
இதற்கிடையே, வரும் ஜூலை மாதம் 11 ஆம் தேதி, சென்னை வானகரத்தில் உள்ள தனியார் திருமண மண்டபத்தில், அதிமுக பொதுக்குழுக் கூட்டத்தை கூட்ட, எடப்பாடி பழனிசாமி தரப்பினர் முடிவு செய்துள்ளனர். அப்போது அதிமுக பொதுச் செயலாளராக எடப்பாடி பழனிசாமியை தேர்ந்தெடுக்க அவர்கள் முடிவு செய்துள்ளனர். மேலும், அதிமுக பொருளாளர் பதவியில் இருந்து ஓ.பன்னீர்செல்வத்தை நீக்கவும் அவர்கள் திட்டமிட்டு உள்ளனர்.
வைத்திலிங்கத்திற்கு தூது!
இந்நிலையில், ஒருங்கிணைப்பாளர் ஓ.பன்னீர்செல்வம் வலதுகரமாக செயல்படும், முன்னாள் அமைச்சர் வைத்திலிங்கத்தை தங்கள் பக்கம் இழுத்து விட்டால் ஓ.பன்னீர்செல்வத்தை கட்டுப்படுத்தி விடலாம் என, எடப்பாடி பழனிசாமி தரப்பினர் கருதுகின்றனர். இதற்கான முயற்சிகளில் அவர் ஈடுபட்டுள்ளதாகவும் கூறப்படுகிறது.
துணை பொதுச் செயலாளர் பதவி!
வைத்திலிங்கத்திற்கு அதிமுக துணை பொதுச் செயலாளர் பதவி வழங்குவதற்குரிய பேச்சு நடத்த, அவரிடம் எடப்பாடி பழனிசாமி ஆதரவாளர்கள் தூது சென்றுள்ளதாக, அக்கட்சி வட்டாரங்கள் தகவல் தெரிவிக்கின்றன.
தூண்டில் போட்ட எடப்பாடி பழனிசாமி - வலையில் சிக்கிய ஓபிஎஸ்!
வைத்திலிங்கத்திற்கு கொரோனா!
இதற்கிடையே, வைத்திலிங்கத்திற்கு இன்று கொரோனா வைரஸ் தொற்று உறுதி செய்யப்பட்டு உள்ளது. இதனால் அவர், மருத்துவர்கள் ஆலோசனைப்படி, வீட்டில் தனிமைப்படுத்திக் கொண்டுள்ளதாக தெரிவித்துள்ளார்.