மிகப்பெரிய சரிவை சந்தித்த முட்டை விலை; அப்படியே ஆடிப் போன நாமக்கல் வியாபாரிகள்!

உலகம் முழுவதும் மனித உயிர்களை கொரோனா வைரஸ் காவு வாங்கிக் கொண்டிருக்கிறது. அதேசமயம் பல்வேறு தொழில்களை முடக்கியுள்ளது. சில எலக்ட்ரானிக் பொருட்களின் விலை உயரத் தொடங்கியுள்ளது. இதற்கிடையில் கோழிக் கறி மூலம் கொரோனா பரவி விடுமோ என்ற அச்சம் ஏற்பட்டுள்ளது. ஆனால் இது ஒரு வதந்தி என்று மருத்துவர்கள் கூறினாலும், பொதுமக்கள் ரிஸ்க் எடுக்க விரும்பவில்லை என்றே தோன்றுகிறது.

இதனால் கறிக் கோழியின் விலை அப்படியே சரிந்துள்ளது. அதேசமயம் கோழிக் கறிக்கும் கொரோனாவிற்கும் தொடர்பு ஏற்படுத்தி சமூக வலைத்தளங்களில் வதந்தி பரப்பியவரை போலீசார் கைது செய்துள்ளனர். அவரிடம் நடத்திய விசாரணையில், கடனுக்கு கறி கொடுக்கவில்லை.

எனவே தான் இப்படியொரு தவறை செய்ததாக ஒப்புக் கொண்டுள்ளார். சென்னையில் கோழிக் கறி விலை கிலோ ரூ.180 முதல் ரூ.200 வரை விற்பனையாகி வந்தது. இந்த சூழலில் தற்போது கிலோ ரூ.100 முதல் ரூ.110 வரை விற்பனையாகிறது.

இதனால் விற்பனையாளர்கள் பெரும் நஷ்டத்தை சந்தித்துக் கொண்டிருக்கின்றனர். இதையொட்டி ஆடு, கடல் உணவுகளின் மீது பொதுமக்கள் நாட்டம் செலுத்தத் தொடங்கியிருக்கின்றனர். இதனால் அவற்றின் விலை ரூ.20 முதல் ரூ.30 வரை அதிகரித்துள்ளது.

தொடக்கப்பள்ளிகளுக்கு விடுமுறை; திரையரங்குகள் மூடல் - தமிழக அரசு உத்தரவு!

மீன்களின் விலை ஒரு கிலோ ரூ.600ல் இருந்து ரூ.800ஆக உயர்ந்துள்ளது. மேலும் ஆட்டு இறைச்சி, மீன் உணவகங்களில் கூட்டம் அலைமோதுகிறது. இந்நிலையில் முட்டை விலை 6 ஆண்டுகளில் இல்லாத சரிவை சந்தித்திருப்பதாக தகவல் கிடைத்துள்ளது.

தமிழகத்தில் முட்டை வியாபாரத்திற்கு அடித்தளமாக நாமக்கல் திகழ்கிறது. நாமக்கல் மண்டலத்தில் மட்டும் 1,100க்கும் மேற்பட்ட கோழிப் பண்ணைகள் இருக்கின்றன. அங்கிருந்து நாளொன்றுக்கு 3.5 கோடி முட்டைகள் உற்பத்தியாகின்றன.

இவை அனைத்தும் தமிழகம், கேரளா உள்ளிட்ட பல்வேறு இடங்களுக்கு ஏற்றுமதி செய்யப்படுகின்றன. குறிப்பாக தமிழக அரசின் சத்துணவு திட்டத்திற்கு முட்டைகள் இங்கிருந்து தான் அனுப்பப்படுகின்றன. கொரோனா பீதி ஒருபுறம் இருக்க கேரளாவில் இருந்து பறவைக் காய்ச்சல் பரவி வருவதாக தகவல்கள் தெரிவிக்கின்றன.

முட்டை விலை சரிவிற்கு இதுவும் ஒரு காரணமாக சொல்லப்படுகிறது. அங்கு ஒரு முட்டை விலை ரூ.2.65ஆக விற்கப்படுவதாக தெரியவந்துள்ளது. இது முட்டை வியாபாரிகளிடம் பெரும் அதிர்ச்சியை ஏற்படுத்தி உள்ளது. முட்டை விற்பனை கடுமையாக பாதிக்கப்பட்டு உள்ளதால் சுமார் 15 கோடி முட்டைகள் தேக்கம் அடைந்துள்ளன.

இதனால் வியாபாரிகளுக்கு பல கோடி ரூபாய் நஷ்டம் ஏற்பட்டுள்ளது. இதன் விளைவாக முட்டை விலையும் வரலாறு காணாத அளவு சரிந்துள்ளது.