வீடுகள், தொழிற்சாலைகளுக்கான மின் இணைப்பு கட்டணம் பல மடங்கு உயருகிறது!

வீடுகளுக்கு மின் இணைப்பு பெறுவதற்கான கட்டணத்தை 5 மடங்கு உயர்த்த மின் வாரியம் முடிவு செய்துள்ளது.

தமிழகம் முழுவதும் சுமார் 3 கோடி மின் இணைப்புகள் உள்ளன. இதில், 2.2 கோடி வீட்டு மின் இணைப்புகளும், 11 லட்சம் குடிசை மின் இணைப்புகளும், 21 லட்சம் விவசாய இணைப்புகளும், 3 லட்சம் தொழிற்சாலை இணைப்புகளும், 30 லட்சம் வர்த்தக நிறுவனங்களுக்கான இணைப்புகளும் அடங்கும்.

அந்தவகையில் மின் இணைப்பு வைத்திருப்பவர்களுக்கு சில ஆண்டுகளுக்கு ஒருமுறை மின் கட்டணம் உயர்த்தப்பட்டு வருகிறது. ஆனால் புதிதாக மின் இணைப்பு பெறுவதற்கான கட்டணம் கடைசியாக கடந்த 1999-ம் ஆண்டு உயர்த்தப்பட்டது. தற்போது 20 ஆண்டுகளுக்கு பிறகு வீடுகள், தொழிற்சாலைகள், வர்த்தக நிறுவனங்கள் உள்ளிட்டவற்றுக்கு மின் இணைப்பு பெறுவதற்கான கட்டணங்களை உயர்த்த தமிழக மின் வாரியம் முடிவு செய்துள்ளது.

அதன்படி, சென்னையில் உள்ள வீடுகளுக்கு ஒருமுனை மின்சார இணைப்பு ரூ.1,600-லிருந்து, ரூ.9,800 ஆக உயர்த்தவும், மும்முனை மின்சார இணைப்புக் கட்டணத்தை ரூ.5,050-ல் இருந்து ரூ.27,660 ஆகவும் உயர்த்தவும் தீர்மானிக்கப்பட்டுள்ளது.

அதேபோல, புறநகர் பகுதிகளில் வீடுகளில் ஒருமுனை மின் இணைப்புக்கான கட்டணம் ரூ.1,600-ல் இருந்து ரூ.9,800 ஆகவும், மும்முனை இணைப்புக்கு ரூ.5,050-ல் இருந்து ரூ.12,060 ஆகவும் உயர்த்தவும் திட்டமிடப்பட்டுள்ளது. புறநகர் பகுதிகளில் உயர்த்த திட்டமிடப்பட்டுள்ள கட்டணம்தான் பிற மாவட்டங்களிலும் அமல்படுத்தப்படும்.

இதேபோல தொழிற்சாலைகள், வர்த்தக மின் இணைப்புகளுக்கான கட்டணத்தை உயர்த்தவும் முடிவு மின்வாரியம் முடிவு செய்துள்ளது. துண்டிக்கப்பட்ட மின் இணைப்பை மீண்டும் பெறுவதற்கும், மின் கட்டணத்துக்கு கொடுக்கும் காசோலைகள் பணம் இல்லாமல் திரும்பினால் அதற்காக வசூலிக்கப்படும் அபராத தொகையை உயர்த்தவும் முடிவு செய்யப்பட்டு உள்ளன.

இந்த கட்டண உயர்வுக்கான ஒப்புதலை வழங்கக் கோரி தமிழ்நாடு மின்சார ஒழுங்குமுறை ஆணையத்திடம் பட்டியல் தாக்கல் செய்யப்பட்டுள்ளது. ஆணையம் ஒப்புதல் வழங்கியதும் புதிய கட்டண உயர்வு அமல்படுத்தப்படும்.