நாகை: அடுத்தடுத்து கடைகள் தீவிபத்து! ரூ. 5 லட்சம் மதிப்பிலான பொருட்கள் எரிந்து நாசம்!

நாகையில் அடுத்தடுத்த கடைகளில் ஏற்பட்ட தீ விபத்தில் 4 கடைகள் எரிந்து நாசமாகியது. இதில் 5 லட்சம் ரூபாய் மதிப்பிலான பொருட்கள் தீயில் கருகின.

நாகை மாவட்டம் செம்பனார்கோவில் அருகில் உள்ள வடகரையில் கவரிங் கடை நடத்தி வருபவர் தியாகராஜன். இவர் நேற்று முன்தினம் இரவு வழக்கம் போல் கடையை பூட்டி விட்டு சென்றுள்ளார். பின்னர், மறுநாள் அதிகாலை 4 மணியளவில் அந்த கடையில் இருந்து புகை வந்தது. தொடர்ந்து நகைக்கடைக்கு அருகில் இருந்த மற்ற பானிபூரி கடை, டீக்கடை, காய்கறி கடைகளிலும் தீ பரவியது. .

இது குறித்து தகவலறிந்து சம்பவ இடத்துக்கு விரைந்து வந்த மயிலாடுதுறை தீயணைப்புத்துறையினர் தீயை கட்டுப்படுத்த முயற்சித்தனர். ஆனால், 4 கடைகளிலும் தீ பரவி முற்றிலுமாக நாசமாகியது. இந்த விபத்தில் கடைகளில் இருந்து 2 லட்சம் ரூபாய் மதிப்பிலான பொருட்கள் தீயில் கருகின. தீ விபத்து ஏற்பட்டதற்கான காரணங்கள் குறித்து இதுவரை தெரியவில்லை. தீ விபத்து சம்பவம் தொடர்பாக பொறையாறு போலீசார், அந்த பகுதியில் பொருத்தப்பட்டிருந்த சிசிடிவி காட்சிகளை வைத்து விசாரணை நடத்தி வருகிறார்.