AIADMK: இவர் எங்க ஆளுங்க; நிச்சயம் திமுகவில் சேரமாட்டார் - அடித்துச் சொன்ன தங்கதமிழ்ச்செல்வன்!

கரூர் மாவட்டத்தைச் சேர்ந்த அதிமுக முன்னாள் அமைச்சர் செந்தில் பாலாஜி. இவர் அதிமுக மாணவரணி செயலாளர், மாவட்ட அதிமுக செயலாளர் உள்ளிட்ட பதவிகளை வகித்தவர். கடந்த 2016 சட்டமன்ற தேர்தலில் அரவக்குறிச்சி தொகுதியில் போட்டியிட்டு வெற்றி பெற்றார்.

ஜெயலலிதா மரணத்திற்கு பின்பு, டிடிவி தினகரன் அணியில் சேர்ந்து கொண்டார். இதையடுத்து செந்தில் பாலாஜி உட்பட 18 எம்.எல்.ஏக்களை சபாநாயகர் பதவி நீக்கம் செய்தார். காலியான தமிழக சட்டமன்ற தொகுதிகளுக்கு விரைவில் தேர்தல் வர வாய்ப்புள்ளது.

இதையடுத்து அதிமுக, அமமுக போட்டி போட்டுக் கொண்டு பூத் கமிட்டி கூட்டம், நிர்வாகிகள் ஆலோசனைக் கூட்டம் நடத்தி வருகின்றனர். இதற்கிடையில் ஜெயலலிதாவின் இரண்டாம் ஆண்டு நினைவு தின அஞ்சலி நிகழ்ச்சியில் வி.செந்தில் பாலாஜி பங்கேற்கவில்லை என்று கூறப்பட்டது.

அப்போது முதல் அவர் கட்சி மாறப் போகிறார் என்றும், திமுகவில் இணையப் போகிறார் என்றும் தகவல்கள் கசியத் தொடங்கின. இதுகுறித்து அதிகாரப்பூர்வ தகவல்கள் ஏதும் வெளியாகவில்லை. இந்த சூழலில் திமுக தலைமை உடன் பேச்சுவார்த்தை முடிந்து விட்டதாக தகவல் வெளியானது.

இந்த செய்தி பரவத் தொடங்கியதும், அமமுகவின் பல்வேறு தலைவர்களும், உறுப்பினர்களும் செந்தில் பாலாஜியை சந்தித்தனர். அவரும் என்னுடன் வர விரும்புபவர்கள் வரலாம் என்று சூசகமாக தெரிவித்ததாக தகவல் வெளியானது.

வரும் 16ஆம் தேதி சென்னையில் கருணாநிதி சிலை திறப்பு விழா நடைபெறுகிறது. அப்போது தனது ஆதரவாளர்களுடன் செந்தில் பாலாஜி திமுகவில் இணையலாம் என்று கூறப்படுகிறது.

இதுகுறித்து பேசிய அமமுகவின் தங்கதமிழ்ச்செல்வன், முன்னாள் அமைச்சர் செந்தில் பாலாஜி திமுகவில் சேரமாட்டார். இதுதொடர்பாக தவறான தகவல்கள் பரப்பப்பட்டு வருகின்றன. தகுதி நீக்கம் செய்யப்பட்ட 18 பேரின் வேட்பு மனுக்களை நிராகரிக்கச் செய்யும் முயற்சியில் தமிழக அரசு ஈடுபட்டு வருகிறது என்று குறிப்பிட்டார்.