ஸ்டாலினை முதல்வர் வேட்பாளராக ஏற்கிறோம் - கரூரில் ராகுல் காந்தி அறிவிப்பு

திமுக தலைவர் மு.க.ஸ்டாலினை தமிழக முதலமைச்சர் வேட்பாளராக ஏற்கிறோம் என்று அகில இந்திய காங்கிரஸ் கட்சியின் முன்னாள் தலைவர் ராகுல் காந்தி தெரிவித்துள்ளார். சட்டசபை தேர்தல் பரப்புரைக்காக தமிழகம் வந்துள்ள ராகுல் காந்தி கோவை, திருப்பூர், ஈரோடு, கரூர் உள்ளிட்ட மாவட்டங்களில் கடந்த மூன்று நாட்களாக பரப்புரையை மேற்கொண்டு வருகிறார்.

இந்நிலையில் இன்று கரூர் அரவங்குறிச்சியில் செய்தியாளர்களை சந்தித்தவர், ''திமுகவுடன் நல்ல நட்புறவு நீடிக்கிறது என்றும் அக்கட்சியின் தலைவர் ஸ்டாலினை தமிழ்நாடு முதலமைச்சர் வேட்பாளராக ஏற்பதாகவும் தெரிவித்தார்.

மேலும், முன்னாள் முதலமைச்சர் கருணாநிதி மீதும் ஸ்டாலின் மீதும் தனக்கு நல்ல மரியாதை இருப்பதாகவும் கூறினார். கடந்த மக்களவை தேர்தலில் இருந்து திமுகவுடன் காங்கிரஸ் கட்சி கூட்டணியில் இருந்து வருகிறது. தற்போது தமழகத்தில் சட்ட சபை தேர்தல் நெருங்கி வரும் நிலையில் திமுக தலைவர் ஸ்டாலினை முதல்வர் வேட்பாளராக காங்கிரஸ் கட்சி அதிகாரபூர்வமாக அறிவித்திருப்பது குறிப்பிடத்தக்கது.