மேகதாதுவில் அணைகட்ட நிதி ஒதுக்கீடு, தமிழக விவசாயிகள் கண்டனம்

மேகதாதுவின் குறுக்கே அணைக்கட்ட ரூபாய் 6000 கோடி ஒதுக்கப்பட்டுள்ளதாக கர்நாடக முதலமைச்சர் சித்தராமையா அறிவித்ததற்கு தமிழக விவசாயிகள் கடும் கண்டனம் தெரிவித்துள்ளனர்.

பெங்களூருவில் நடைபெற்ற சுதந்திர தின விழாவில் பங்கேற்று பேசிய கர்நாடக முதல்வர் சித்தராமையா மேகதாது குறுக்கே அணைக்கட்ட ரூ.5912 கோடி ஒதுக்கப்படும் என்று அறிவித்தார். அணையானது விரைவில் கட்டப்பட்டு மின்சாரம் உற்பத்தி செய்யப்படுவதோடு, கர்நாடகாவின் குடிநீர் பிரச்னை விரைவில் தீரும் என்றார். சித்தராமையாவின் இந்த பேச்சு தமிழக விவசாயிகள் இடையே கடும் கொந்தளிப்பை ஏற்படுத்தியுள்ளது. அவரது பேச்சிற்கு கடும் கண்டனம் தெரிவித்துள்ளனர். பிரதமர் மோடி மற்றும் தமிழக முதல்வர் ஜெயலலிதா இப்பிரச்னையில் தலையிட்டு நிரந்த தீர்வு காண வேண்டும் என்று தமிழக விவசாயிகள் வலியுறுத்தி உள்ளனர். மேலும் கர்நாடக முதலமைச்சரை கண்டித்து சட்டப்பேரவையில் தீர்மானம் நிறைவேற்ற வேண்டும் என்று கூறியுள்ளனர்.