அரசு பள்ளிகளில் பெருகும் மாணவர்கள் எண்ணிக்கையை குறைக்க புதிய விதி அமல்

ஒரு வகுப்பில் அதிகளவிலான மாணவர்கள் எண்ணிக்கை இருந்தால், மிகுதியான மாணவர்களை அருகிலிருக்கும் மற்ற பள்ளிகளுக்கு மாற்றுவது தொடர்பாக தமிழக பள்ளிகல்வித்துறை இயக்குநர் அனைத்து மாவட்ட கல்வி துறை அதிகாரிகளுக்கு அறிவுறுத்தியுள்ளார்.

கல்வி உரிமைச் சட்டத்தில் கொடுக்கப்பட்டுள்ள விதிகளை முறையாக பின்பற்றிட தமிழக அரசு முடிவு செய்துள்ளது. அதன்படி வரும் கல்வியாண்டில் பல்வேறு புதிய விதிகளை பின்பற்றிட அனைத்து மாவட்ட கல்வித்துறை அதிகாரிகளுக்கு பள்ளிக் கல்வித்துறை இயக்குநர் ரெ. இளங்கோவன் சுற்றறிக்கை அனுப்பியுள்ளார்.

அதன்படி, அரசு மற்றும் அரசு உதவி பெறும் பள்ளிகளில் மிகுதியான மாணவர்கள் எண்ணிக்கை காணப்படுகின்றன. அவர்களை அருகிலிருக்கும் வேறொரு அரசு பள்ளிகளுக்கு மாற்றிட பள்ளி கல்வித்துறை சார்பில் உடனடியாக நடவடிக்கை எடுக்கப்படவுள்ளது.

தமிழகத்தின் பல பகுதிகளில் பள்ளிகள் மிகவும் தொலைவாக அமைந்துள்ளன. அவ்வாறான பள்ளிகளில் மிகுதியான மாணவர் எண்ணிக்கையை குறைத்திட ஒரு வகுப்பு இரண்டு வகுப்புகளாக பிரிக்கப்படும் என தெரிவிக்கப்பட்டுள்ளது.

மேலும், வருகிற கல்வியாண்டில் ஒன்று முதல் பன்னிரெண்டாம் வகுப்புகள் வரை, ஒவ்வொரு வகுப்புகளிலும் அதிகம்பட்சம் 60 மாணவர்கள் மட்டுமே இருக்க வேண்டும் என்ற விதியை பள்ளி கல்வித்துறை நடைமுறைப்படுத்தும் என எதிர்பார்க்கப்படுகிறது.

தவிர, ஒரே ஆசிரியர் இரண்டு வேவ்வேறு பாடங்களை எடுக்கும் வழக்கம் பல பள்ளிகளில் காணப்படுகிறது. இந்த பிரச்னையை தவிர்க்க ஒரு பாடத்திற்கு ஒரு ஆசிரியர் என்ற வகையில் ஆசிரியர்களின் பணி நியமனங்களை அரசு மேற்கொள்ளவுள்ளது.

இதுக்குறித்து பள்ளிக்கல்வித்துறை இயக்குநர் ரெ. இளங்கோவன் தனது சுற்றறிக்கையில், மாணவர்களின் எண்ணிக்கைக்கு ஏற்ப ஆசிரியர்கள் பணியில் நியமிக்கப்பட வேண்டும். மேலும் ஆங்கில வழி கல்விக்கு தனியாக ஆசிரியர் பணி நியமனங்கள் மேற்கொள்ளப்பட வேண்டும் என்று தெரிவித்துள்ளார்.