பி.பி.செல்லத்துரை நியமனம் ரத்து: பாமக தலைவர் ராமதாஸ் வரவேற்பு!!

மதுரை காமராஜ் பல்கலைக்கழகத்தின் துணை வேந்தராக பி.பி. செல்லத்துரை நியமிக்கப்பட்டது செல்லாது என உயர்நீதிமன்றம் வழங்கியுள்ள தீர்ப்பை பாட்டாளி மக்கள் கட்சியின் தலைவர் ராமதாஸ் வரவேற்றுள்ளார்.

மதுரையில் உள்ள காமராஜ் பல்கலைக்கழகத்தின் துணைவேந்தராக, பி.பி.செல்லத்துரை கடந்த ஆண்டு நியமிக்கப்பட்டார். இந்த நியமனத்தில் முறைகேடு நடந்திருப்பதாக கூறி, டிராபிக் ராமசாமி மற்றும் மதுரை எஸ்.எஸ்.அந்தோணிராஜ் ஆகியோர் உயர்நீதிமன்றத்தில் வழக்குத் தொடர்ந்தனர்.

இந்த வழக்கை விசாரித்த உயர்நீதிமன்றம், துணைவேந்தர் பி.பி.செல்லத்துரையின் நியமனம் செல்லாது எனவும், வேறுகுழுவை அமைத்து புதிய துணை வேந்தரை நியமனம் செய்யும்படியும் உத்தரவிட்டது.

இந்நிலையில், பாட்டாளி மக்கள் கட்சியின் தலைவர் டாக்டர் ராமதாஸ் இந்தத் தீர்ப்பு குறித்து கருத்து தெரிவித்துள்ளார். அதில், “மதுரை துணைவேந்தர் பி.பி.செல்லத்துரையின் நியமனத்தை உயர்நீதிமன்றம் ரத்து செய்து தீர்ப்பளித்துள்ளது வரவேற்கத்தக்கது. இருப்பினும், நீதிமன்றம் சென்று இந்த முடிவு எடுக்கப்பட்டுள்ளது வருத்தமளிக்கிறது. தமிழ்நாடு அரசு, இந்த தீர்ப்பை உச்சநீதிமன்றத்தில் மேல்முறையீடு செய்யாமல், தேர்வுக்குழுவை அமைத்து புதிய துணைவேந்தரை நியமிக்க வேண்டும்” என்று தெரிவித்துள்ளார்.