TN Diwali Holidays: விட்டாச்சு தீபாவளி விடுமுறை; ஆன்லைன் வகுப்பு கிடையாதாம்!

கொரோனா பாதிப்பு இன்னும் கட்டுக்குள் வந்தபாடில்லை. தமிழகத்தில் தினசரி 2 ஆயிரத்திற்கும் அதிகமான எண்ணிக்கையில் நோய்த்தொற்று பரவி வருகிறது. இதைக் கட்டுப்படுத்த மாநில அரசு சார்பில் நடவடிக்கை எடுக்கப்பட்டு வருகிறது. இந்த சூழலில் மாணவர்களை பள்ளி, கல்லூரிகளுக்கு வரவழைப்பது ஆபத்தில் முடியும். எனவே ஆன்லைன் வாயிலான வகுப்புகள் நடத்தப்பட்டு வருகின்றன. இதுதொடர்பாக தமிழக அரசு சார்பில் வழிகாட்டுதல்கள் வெளியிடப்பட்டன. இதனை பள்ளி, கல்லூரிகள் முறையாக பின்பற்ற வேண்டும் என்று அறிவுறுத்தப்பட்டுள்ளது.

அதேசமயம் ஆன்லைன் வாயிலான கல்வி மாணவர்களை திசை திருப்பவும் வாய்ப்பிருக்கிறது. அதில் வரும் விளம்பரங்கள், பொழுதுபோக்கு அம்சங்கள் உள்ளிட்டவை பாடத்திலிருந்து கவனத்தை மாற்றக்கூடும். இதுதொடர்பாக எச்சரிக்கையாக இருக்கவும் வலியுறுத்தப்பட்டது. அதன்படி பல மாதங்களாக ஆன்லைன் வகுப்புகள் நடத்தப்பட்டு வருகின்றன. இதன்மூலம் ஆசிரியர்கள் நடத்தும் பாடங்கள் மாணவர்களுக்கு முழுமையாக போய்ச் சேருகிறதா என்பதும் கேள்விக்குறியாக இருக்கிறது.

இந்நிலையில் வரும் 14ஆம் தேதி தீபாவளி பண்டிகை கொண்டாடப்பட உள்ளது. வழக்கமாக பள்ளிகள், கல்லூரிகளில் நேரடியாக வகுப்புகள் நடைபெற்று வந்தால் பண்டிகைக்கு நீண்ட விடுமுறை கிடைக்கும். ஆனால் இம்முறை ஆன்லைன் வகுப்புகள் என்பதால் அதற்கான வாய்ப்பில்லை என்று எதிர்பார்க்கப்பட்டது. இந்த சூழலில் அனைத்து பள்ளி, கல்லூரிகளுக்கும் இன்று (நவம்பர் 12) முதல் நான்கு நாட்களுக்கு தீபாவளி விடுமுறை விடப்பட்டுள்ளது.

தீபாவளி வந்தாச்சு: தமிழக மக்களுக்கு ரூ.2,000 பரிசுத் தொகை?

எனவே ஆன்லைன் வகுப்புகள் இன்றி மாணவர்கள் மகிழ்ச்சியாக பொழுதைக் கழிக்கலாம். தீபாவளி அன்று பாதுகாப்பான முறையில் பட்டாசுகள் வெடிக்க அறிவுறுத்தப்பட்டுள்ளது. அதேசமயம் வரும் 14ஆம் தேதி குழந்தைகள் தினம் கொண்டாடப்படுகிறது. இதையொட்டி சிறப்பு நிகழ்ச்சிகள், போட்டிகளுக்கு ஏற்பாடு செய்யப்பட்டுள்ளன.

எனவே அன்றைய தினம் ஆன்லைன் வாயிலாக மாணவர்களுக்கு கலை நிகழ்ச்சிகள் நடத்தி பரிசுகள் வழங்க தனியார் பள்ளிகள் திட்டமிட்டுள்ளன. இது மாணவ, மாணவிகளுக்கு மிகுந்த உற்சாகத்தை ஏற்படுத்தும் என்று எதிர்பார்க்கப்படுகிறது.