ஸ்டெர்லைட் துப்பாக்கிச்சூடு: தமிழக அரசு விளக்கமளிக்க உத்தரவு!

தூத்துக்குடியில் ஸ்டெர்லைட் ஆலைக்கு எதிராக போராடிய மக்கள் மீது, காவல்துறையினர் நிகழ்த்திய துப்பாக்கிச்சூட்டுக்கு தமிழக அரசு விளக்கமளிக்க வேண்டும் மத்திய உள்துறை அமைச்சகம் உத்தரவு பிறப்பித்துள்ளது.

தூத்துக்குடியில் செயல்பட்டு வரும் ஸ்டெர்லைட் ஆலைக்கு எதிராக அ.குமெரெட்டியாபுரம் கிராம மக்களின் போராட்டம் நேற்று 100வது நாளை எட்டிய நிலையில், சுற்றுவட்டாரத்தைச் சேர்ந்த பல்லாயிரகணக்கான கிராம மக்கள் மாவட்ட ஆட்சியர் அலுவலகத்தை முற்றுகையிட முயற்சி செய்தனர். அப்போது கிராம மக்களை காவல்துறையினர் தடுத்து நிறுத்தியதால் பொதுமக்களுக்கும் போலீசாருக்கும் இடையே தள்ளுமுள்ளு ஏற்பட்டது.

தடையை மீறி ஆட்சியர் அலுவலகத்தை முற்றுகையிட முயன்றவர்கள் மீது, போலீசார் தடியடி நடத்தியும், கண்ணீர் புகைக்குண்டுகளை வீசியும் கலைக்க முயன்றனர். ஆனால் ஆயிரகணக்காக திரண்ட மக்கள், அத்தனை தடுப்புகள், தடியடிகளை தாண்டி மாவட்ட ஆட்சியர் அலுவலகத்துக்குள் நுழைந்தனர்.


அப்போது போலீசார் துப்பாக்கிச் சூடு நடத்தியதில் 10க்கும் மேற்பட்டோர் பலியாகினர். மேலும் பலர் படுகாயங்களுடன் மருத்துவமனையில் அனுமதிக்கப்பட்டுள்ளதால் பலியானோர் எண்ணிக்கை மேலும் அதிகரிக்கலாம் என்று எதிர்பார்க்கப்படுகிறது.

ஸ்டெர்லைட் போராட்டத்தில் தவிர்க்க முடியாத நிலையில் துப்பாக்கிச்சூடு நடத்தப்பட்டதாக அரசுத் தரப்பில் தெரிவிக்கப்பட்டுள்ள நிலையில், இதற்கு அரசியல் தலைவர்கள் பலரும் கண்டனம் தெரிவித்து வருகின்றனர்.

தற்போது ஸ்டெர்லைட் ஆலைக்கு எதிராக போராடிய அப்பாவி மக்கள் மீது துப்பாக்கிச்சூடு நடத்தியதையும் கண்டித்து பல்வேறு இடங்களில் மக்கள் போராட்டங்களில் ஈடுபட்டு வருவதால் தமிழகம் முழுவதும் பதற்றமான சூழ்நிலை நிலவி வருகிறது.

இந்த நிலையில் ஸ்டெர்லைட் ஆலைக்கு எதிராக போராடிய மக்கள் மீது, காவல்துறையினர் நிகழ்த்திய துப்பாக்கிச்சூட்டுக்கு தமிழக அரசு விளக்கமளிக்க வேண்டும் மத்திய உள்துறை அமைச்சகம் உத்தரவு பிறப்பித்துள்ளது.