மீனாட்சி அம்மன் கோயிலில் எத்தனை லட்சம் இலவச லட்டு கொடுத்திருக்காங்க தெரியுமா?

மதுரை: மீனாட்சி அம்மன் கோயிலில் இலவச லட்டு வழங்கும் திட்டத்தின் மூலம் எவ்வளவு லட்டுகள் விநியோகம் செய்யப்பட்டுள்ளது என்ற தகவல் வெளியாகியுள்ளது.

மதுரை என்றாலே நமது நினைவுக்கு வரும் பல விஷயங்களில் முதன்மையானது மீனாட்சி அம்மன் கோயில். அப்படி, மதுரையையே ஆட்சி செய்து கொண்டிருக்கும் உலகப்புகழ் பெற்ற மீனாட்சி அம்மனை தரிசிக்க வெளிநாடு, வெளிமாநிலங்கள் என ஆண்டுதோறும் சுமார் 50 லட்சத்துக்கும் மேற்பட்ட பக்தர்கள் வருகின்றனர். மத்திய அரசின் தூய்மை இந்தியா திட்டத்தின் கீழ் இரண்டாவது முறையாக தூய்மை விருதும் கிடைத்துள்ளது.

இதனிடையே, திருப்பதி ஏழுமலையான் கோயிலில் பக்தர்களுக்கு பிரசாதமாக லட்டு வழங்கப்படுவது போல, மதுரை மீனாட்சி அம்மன் கோயிலிலும் பிரசாதமாக லட்டு வழங்க கோயில் நிர்வாகம் திட்டமிட்டது. இதற்காக லட்டு தயாரிக்கும் இயந்திரமும் வாங்கப்பட்டது.

“மீனாட்சி அம்மன் கோயிலில் வெடிகுண்டு”

அதன்படி, மனிதர்கள் கைபடாமல் முழுக்க முழுக்க இயந்திரத்தால் தயாரிக்கப்பட்டு பக்தர்களுக்கு இலவசமாக லட்டு பிரசாதம் வழங்கும் திட்டம், கடந்த நவம்பர் மாதம் 8ஆம் தேதி தமிழக முதலமைச்சர் எடப்பாடி பழனிசாமியால் தொடங்கி வைக்கப்பட்டது. அதனைத்தொடர்ந்து, கோயிலுக்கு வரும் அனைத்து பக்தர்களும் 30 கிராம் மதிப்புள்ள லட்டு இலவசமாக வழங்கப்பட்டு வருகிறது.

திருப்பதியில் ஒருவருக்கு ஒரு லட்டு மட்டும்தான்... எக்ஸ்டிரா வேண்டும்னா...

இந்த நிலையில் கடந்த நவம்பர் 8ஆம் தேதி முதல் தற்போது வரை 51 நாட்களில் சுமார் பத்து லட்சம் லட்டுகள் விநியோகம் செய்யப்பட்டுள்ளதாக கோயில் நிர்வாகம் தரப்பில் தகவல் தெரிவிக்கப்பட்டுள்ளது.