தமிழக சட்டமன்ற தேர்தலை நடத்த இத்தனை கோடி செலவாகுமா?

தமிழகம் இன்னும் சில மாதங்களில் சட்டப்பேரவை தேர்தலை எதிர்கொள்ளவிருக்கிறது. அதற்கான பணிகளை அரசியல் கட்சியல் இப்போதே தொடங்கி விட்டன. கூட்டணி பேச்சுவார்த்தைகள், கூட்டணி கட்சிகளுக்கு இடங்களை ஒதுக்குவது, தேர்தல் பிரசாரம் என்பன உள்ளிட்ட பல்வேறு விஷயங்கள் அரசியல் களத்தில் அரங்கேறி வருகிறது.

அதேசமயம், தேர்தலுக்காக ஆயத்த பணிகளை தேர்தல் ஆணையமும் தொடங்கியுள்ளது. அந்த வகையில், இறுதி வாக்காளர் பட்டியலை வருகிற 15ஆம் தேதி தேர்தல் ஆணையம் வெளியிடவுள்ளது. இது தவிர 100 சதவீத வாக்குகள் பதிவாகும் பொருட்டு விழிப்புணர்வு ஏற்படுத்துவது, வாக்குப் பதிவு மையங்களை அமைப்பது என்பன தேர்தலுக்கான பல்வேறு பணிகளையும் தேர்தல் ஆணையம் மேற்கொண்டு வருகிறது.

கொரோனா காலம் என்பதால் தகுந்த பாதுகாப்பு முன்னெச்சரிக்கை நடவடிக்கைகளை பின்பற்றி வாக்குப்பதிவை நடத்துவது அவசியமாகிறது. எனவே, கூடுதல் கவனத்துடன் தேர்தல் ஆணையம் அதற்கான நடவடிக்கைகளை மேற்கொண்டு வருகிறது. ஏற்கனவே கொரோனா காலத்தில் பீகார் சட்டமன்ற தேர்தல் மற்றும் சில மாநிலங்களில் இடைத்தேர்தல் நடத்தப்பட்டுள்ளது. அதனால், அதனை பின்பற்றி தமிழகத்திலும் தேர்தல் நடத்தப்படவுள்ளது.

ரஜினி பெயரில் கட்சி தொடக்கம்: ரசிகர்கள் உற்சாகம்!

முன்னதாக, கொரோனாவை கருத்தில் கொண்டு இரண்டு கட்டங்களாக தமிழகத்தில் சட்டமன்ற தேர்தலை தேர்தல் ஆணையம் நடத்தவுள்ளதாக தகவல் வெளியாகின. ஆனால், அதில் பல்வேறு சிக்கல்கள் இருப்பதாக கூறி தமிழக அரசியல் கட்சிகள் எதிர்ப்பு தெரிவித்தன. இதையடுத்து, அந்த தகவலுக்கு தேர்தல் ஆணையம் தரப்பில் மறுப்பு தெரிவிக்கப்பட்டது.

இந்த நிலையில், தமிழக சட்டமன்றத் தேர்தல் நடத்துவதற்கு ரூ.621 கோடி செலவாகும் என்று தெரிவித்துள்ள தலைமைத் தேர்தல் அதிகாரி சத்யபிரதா சாகு, இதனை தமிழக அரசிடம் கேட்டுள்ளோம் என்றும் தெரிவித்துள்ளார். கொரோனா காலம் என்பதால் தேர்தல் செலவு அதிகரிக்கக் கூடும் என்றும் அவர் தெரிவித்துள்ளார்.