குஷ்பூ பாஜகவில் இணைந்தால் வரவேற்பேன்: பாஜக தலைவர் எல்.முருகன்

பாஜக கட்சியின் துணைத் தலைவர்கள், தேசியச் செயலாளர்கள், தேசிய பொதுச் செயலாளர்கள், செய்தி தொடர்பாளர்கள் உள்ளிட்ட பல்வேறு பதவிகளுக்கு புதிய நிர்வாகிகளை நியமித்து, அவர்களின் பெயர் பட்டியலை அக்கட்சியின் தேசியத் தலைவர் ஜே.பி.நட்டா சில தினங்களுக்கு முன்னர் வெளியிட்டிருந்தார். அதில், தமிழகத்தைச் சேர்ந்த பாஜகவின் மூத்த தலைவர்கள் ஒருவரின் பெயர் கூட இடம்பெறாதது அக்கட்சித் தொண்டர்களை அதிர்ச்சியடைய செய்துள்ளது.

தேசியச் செயலாளர் பதவியில் இருந்துவந்த ஹெச்.ராஜா அந்தப் பொறுப்பில் இருந்து விடுவிக்கப்பட்டுள்ளது பேசுபொருளாகி உள்ளது. இந்த நிலையில், பாஜக தேசிய நிர்வாகிகள் பட்டியலில் தமிழகத்தை சேர்ந்தவர்கள் இடம் பெறாதது தனக்கு அதிர்ச்சியளிக்கவில்லை என்று அக்கட்சியின் மாநில தலைவர் எல்.முருகன் தெரிவித்துள்ளார்.

மேலும், நடிகை குஷ்பூ பாஜகவில் இணைந்தால் அவரை தான் வரவேற்பதாகவும் எல்.முருகன் தெரிவித்துள்ளார். திமுகவில் இருந்து விலகி 2016ஆம் ஆண்டு சட்டமன்ற தேர்தலுக்கு முன்பு காங்கிரஸ் கட்சியில் இணைந்த குஷ்பூவுக்கு அக்கட்சி சார்பில் அவர் எதிர்பார்த்ததாக கூறப்படும் எம்.எல்.ஏ., எம்.பி. சீட்டுகள் தற்போது வரை வழங்கப்படவில்லை.

குஷ்பூவுடன் இணக்கம் காட்டும் பாஜக: வழக்கத்துக்கு மாறாக பிறந்தநாள் வாழ்த்துகள்!

காங்கிரஸ் கட்சியில் ஈ.வி.கே.எஸ். ஆதரவாளராக காட்சியளித்த குஷ்பூ, தமிழக அரசியலில் தீவிரமாக ஈடுபடாமல் தேசிய அரசியலில் மட்டுமே கவனம் செலுத்தி வந்தார். ஆனால், தற்போது அதிலும் ஆர்வம் காட்டாமல் உள்ளதுடன், காங்கிரஸ் கட்சியில் ஓரங்கட்டப்பட்ட நிலையிலேயே தற்போது குஷ்பூ இருந்து வருகிறார்.

எனவே, குஷ்பூ விரைவில் பாஜகவில் ஐக்கியமாவார் எனவும் தகவல்கள் வெளியாகி வருகின்றன. ஆனால், குஷ்பூ தரப்பிலோ இதற்கு எவ்வித மறுப்பும் இதுவரை தெரிவிக்கப்படவில்லை.

முன்னதாக, பாஜகவுக்கு ஏதிராக கடுமையான விமர்சனங்களை முன் வைத்து வந்த குஷ்பூ, அக்கட்சி கொண்டு வந்து கடும் எதிர்ப்புகளுக்கு உள்ளான சமீபத்திய சட்டங்களுக்கு எதிர்வினையாற்றாமல் உள்ள நிலையில், சமீபத்தில் தனது 50ஆவது பிறந்தநாளை கொண்டாடினார். அப்போது வழக்கத்துக்கு மாறாக அவருக்கு பாஜக தலைவர்கள் வாழ்த்துகளை தெரிவித்தது உற்று நோக்கப்பட்டது.