விவி மினரல்ஸ் அதிபர் வீட்டில் வருமானவரித்துறை சோதனை!

விவி மினரல்ஸ் நிறுவனருக்குச் சொந்தமான வீடு, அலுவலகம் என 100க்கும் மேற்பட்ட இடங்களில் இன்று காலை வருமான வரித்துறையினர் திடீர் சோதனை நடத்தினர்.

நெல்லை மாவட்டம் திசையன்விளையை தலைமையிடமாக கொண்டு இயங்கும் நிறுவனம் விவி மினரல்ஸ். இந்நிறுவனத்தின் அலுவலகம் நெல்லையில் மட்டுமில்லாது, தூத்துக்குடி, சென்னை நுங்கம்பாக்கம், திருவான்மியூர் என தமிழகத்தின் பல்வேறு இடங்களில் உள்ளது.

இந்நிலையில், இன்று காலை வருமானவரித்துறை அதிகாரிகள், விவி மினரல்ஸ் நிறுவனத்தின் நூற்றுக்கும் மேற்பட்ட அலுவலகங்களில் திடீர் சோதனை நடத்தினர். சோதனையில் இதுவரை எந்த ஆவணங்களும் பறிமுதல் செய்யப்பட்டதாக தகவல் வரவில்லை. ஆனால், கடந்த 3 ஆண்டுகளாக வரி ஏய்ப்பு செய்யப்பட்டதாக முதற்கட்ட விசாரணையில் தெரியவந்துள்ளது. அதற்கான ஆதாரங்கள் சிக்கியுள்ளதா என்பது குறித்த தகவல்கள் விரைவில் தெரியவரும் என்று எதிர்பார்க்கப்படுகிறது.