பாஜக ஆட்சிக்குக் கண்டனம்: பதிப்பகத்தின் இணையதளம் முடக்கம்

இந்தியாவில் மத்தியில் ஆட்சி செய்யும் பாஜகவைக் கண்டித்து தமிழகத்தைச் சேர்ந்த பதிப்பகம் மற்றும் புத்தக விற்பனை நிலையங்களின் இணையதளங்கள் முடக்கப்பட்டுள்ளன.

இந்தோனேஷியாவைச் சேர்ந்த அடையாளம் அறியவராத ஹேக்கர்கள் பாஜக ஆட்சிக்கு கண்டனம் தெரிவிக்கும் விதமாக பல இணையதளங்களை முடக்கியுள்ளனர். முடக்கப்பட்ட இணையதளத்தில் பாஜக அரசு மத்தியில் ஆட்சிக்கு வந்த பிறகு விவசாயிகள் கொல்லப்படுகிறார்கள் என்றும் பசு பாதுகாப்பு என்ற பெயரில் மனிதர்கள் தாக்கப்படுகிறார்கள் என்றும் பல்வேறு குற்றச்சாட்டுகள் ஆங்கிலத்தில் இடம்பெற்றுள்ளன.

சென்னையில் இருந்து இயங்கும் டிஸ்கவரி புக் பேலஸ் பதிப்பகம் மற்றும் புத்தக விற்பனை நிலையத்திற்குச் சொந்தமான இணையதளமும் (http://discoverybookpalace.com/) முடக்கியுள்ளது.

இது குறித்து கருத்து தெரிவித்துள்ள டிஸ்கவரி புக் பேலஸ் நிறுவனத்தின் உரிமையாளர் வேடியப்பன், “நேற்று இரவே இணையதளம் முடக்கப்பட்டுவிட்டது. அதை சரிசெய்ய முயற்சித்து வருகிறோம். டிஸ்கவரி புக் பேலஸ் நிறுவனத்திற்கும் பாஜகவுக்கும் எந்த தொடர்பும் இல்லை. நாங்கள் நடத்தும் நிகழ்ச்சிகளிலும் யாரும் சர்ச்சைக்குரிய வகையில் கருத்துக்களைக் கூறவில்லை” என்று தெரிவித்துள்ளார். மேலும், தங்கள் இணையதளத்தைப் போல ஒரே சர்வரில் உள்ள வேறு சில இணையதளங்களும் முடக்கப்பட்டுள்ளன என்றும் அவர் கூறினார்.

இதே போல, வீ கேன் ஷாப்பிங் என்ற நிறுவனத்தின் இணையதளமும் (http://www.wecanshopping.com/) முடக்கப்பட்டுள்ளது. அதுவும் புத்தக விற்பனை நிறுவனம் என்பது குறிப்பிடத்தக்கது.