மு.க.அழகிரி தனிக் கட்சி- பின்னணியில் பாஜகவா?

தமிழக சட்டமன்ற தேர்தலுக்கு இன்னும் ஆறு மாதங்களே உள்ள நிலையில் ரஜினி எப்போது கட்சி ஆரம்பிப்பார் என்ற கேள்வி தமிழக அரசியல் களத்தில் தொடர்ந்து வலம் வருகிறது. தற்போது அதோடு மற்றொரு கேள்வியும் சேர்ந்துள்ளது.

திமுகவிலிருந்து நீக்கப்பட்ட பின்னர் அரசியலிலிருந்தே ஒதுங்கியிருந்த மு.க.அழகிரி அவ்வப்போது விமானநிலையத்தில் திமுக தலைமையை தாக்கி ஏதேனும் ஒரு கருத்தை தெரிவித்துவிட்டுச் செல்வார். அதன்பின்னர் அவரை அடுத்து விமான நிலையம் வரும்போதுதான் செய்தியாளர்கள் பார்க்க முடியும்.

திமுகவில் தனக்கான ஆதரவாளர்கள் இருக்கிறார்கள் என அவர் காட்ட நினைத்த முயற்சிகளும் பலனளிக்காமல் போனது. அழகிரியோடு நெருக்கம் பாராட்டினால் கட்சியில் வளர முடியாது என அவருடன் இருந்தவர்களும் ஒதுங்கியிருந்துள்ளனர்.

அமித் ஷா கேட்கும் 50 தொகுதிகள்? அதிமுகவுக்கு அத்தனை பக்கத்திலும் அடி!

ஆனால் அவ்வப்போது அழகிரி கட்சி தொடங்கப்போகிறார் என்ற தகவல் மட்டும் வந்து செல்கிறது. இந்நிலையில் தீபாவளியை முன்னிட்டு அழகிரி தனது ஆதரவாளர்களுக்கு போன் செய்து வாழ்த்து தெரிவித்ததோடு கட்சி தொடங்கும் முடிவு குறித்து பேசியதாக தெரிகிறது. டிசம்பரில் அதற்கான பணிகள் ஆரம்பமாகும் எனக் கூறப்பட்டது.

இந்த நிலையில் நேற்று (நவம்பர் 15) மதுரையில் மு.க.அழகிரி செய்தியாளர்களைச் சந்தித்தார். அப்போது பேசிய அவர், “2021 சட்டமன்றத் தேர்தலில் யாருக்கு ஆதரவு அளிப்பது அல்லது புதிய கட்சி தொடங்குவது குறித்து எனது ஆதரவாளர்களுடன் கலந்து ஆலோசித்த பின்னரே முடிவுகள் தெரிவிக்கப்படும். கொரோனா நோய் பரவல் காரணமாக எனது ஆதரவாளர்களைச் சந்திக்கவில்லை. எனது ஆதரவாளர்கள் என்னிடம் தான் உள்ளனர். அனைவரும் நன்றாக உள்ளனர். திமுகவில் புகைச்சல் அதிகமாகியுள்ளது. 2021 சட்டமன்றத் தேர்தலுக்குப் பின்னர் திமுகவின் நிலையை நீங்களே அறிந்து கொள்ளலாம்” என்று கூறினார்.

திமுகவை அதன் தலைமையை எதிர்க்கும் விதமாக பேசிவரும் அழகிரி கட்சி தொடங்கும் முடிவு வரை சென்றிருப்பதால் அவருக்கு பின்னால் யார் தூண்டுதலாக, உறுதுணையாக உள்ளனர் என்ற விவாதமும் அரசியல் அரங்கில் எழுந்துள்ளது. ஆளுங்கட்சியை எதிர்த்து திமுக கூட்டணி வலுவாக உள்ள நிலையில் அமமுக, மக்கள் நீதி மய்யம் ஆகிய கட்சிகள் தனியாக எதிர்த்து வருகின்றன.

சசிகலா ரிலீஸ்: எதிர்பார்க்கும் எடப்பாடி - காரணம் என்ன?

இதனால் ஆளுங்கட்சி எதிர்ப்பு வாக்குகள் திமுகவுக்கு செல்வதை இவை ஓரளவு தடுக்க வாய்ப்புள்ளதாக கூறப்படுகிறது. இப்போது அழகிரியும் தன் பங்குக்கு தனி கட்சி தொடங்கி திமுகவை விமர்சித்து தேர்தலில் இறங்கும் நிலை உருவாகிறது. இதனால் அழகிரிக்கு பின்னால் பாஜக இருக்குமோ என்றும் சந்தேகத்தை கிளப்புகின்றனர் அரசியல் விமர்சகர்கள்.