ஈரோடு கிழக்கு: திமுகவுக்குள் ஈகோ யுத்தம்? யார் அந்த எலெக்‌ஷன் எக்ஸ்பெர்ட்?

காங்கிரஸ் வேட்பாளராக ஈவிகேஎஸ் இளங்கோவனை அறிவித்த பின்னர் திமுக தரப்பில் பிரச்சாரம் மேலும் சூடுபிடித்தது. ஆனால் காங்கிரஸ் கட்சி பெரியளவில் ஆர்வம் காட்டவில்லையோ என்ற தோற்றம் உருவாகியுள்ளது. கட்சியின் மாநிலத் தலைவரான கே.எஸ்.அழகிரியும் முக்கிய நிகழ்வுகளில் கூட ஆஜர் ஆகவில்லை. செயல்வீரர்கள் கூட்டத்தை தவிர வேறு நிகழ்வுகளில் அவர் தலைகாட்டவில்லை. மூத்த தலைவரான ஈவிகேஎஸ் இளங்கோவன் சட்டமன்ற உறுப்பினராகிவிட்டால் நம் மீது மீடியா கவனம் குறைந்துவிடும் என்று முக்கிய தலைகள் கருத்துவதாகவும் களத்திலிருந்து வரும் தகவல்கள் தெரிவிக்கின்றன.

காங்கிரஸ் பற்றி கவலைப்பட வேண்டாம், நமக்கு தேவை கூட்டணி வேட்பாளர் மிகப் பெரும் வித்தியாசத்தில் வெற்றி பெற வேண்டும். நமது ஆட்சி எப்படி இருக்கிறது, மக்கள் என்ன நினைக்கிறார்கள் என்பதை அறிந்து கொள்ளும் கண்ணாடி தான் இந்த இடைத்தேர்தல். அதை உணர்ந்து செயல்படுங்கள் என்று அமைச்சர்களை முடுக்கிவிட்டுள்ளார் ஸ்டாலின்.

தங்கள் பவரை காட்ட வேண்டும் என்று அமைச்சர்கள் பலரும் ஈரோட்டை முற்றுகையிட்டுள்ளனர். அதில் தான் சிக்கலே உருவாகியுள்ளது என்கிறார்கள். ஈரோடு மாவட்ட அமைச்சர் முத்துச்சாமி களமாடி வரும் நிலையில் கே.என்.நேரு, எ.வ.வேலு போன்ற சீனியர் அமைச்சர்களும் களத்தில் நிற்பதால் வெற்றி யாரால் வந்தது என்ற ரீதியில் மெல்லிதாக ஈகோ முளைவிட்டுள்ளதாக சொல்கிறார்கள். அதுமட்டுமல்லாமல் செந்தில் பாலாஜி தனது கரூர் டீமுடன் ஈரோட்டை சுற்றி வருகிறார்.

அதிமுக அணியிலும் விக்கெட்டுக்களை வீழ்த்த அவர் முயற்சித்து வருவதால் திமுக சீனியர் அமைச்சர்கள் மத்தியில் புகைச்சல் உருவாகியுள்ளதாம். நகர்ப்புற உள்ளாட்சித் தேர்தலில் கோவையில் கிடைத்த வெற்றியின் மொத்த கிரெடிட்டையும் ஸ்டாலின் செந்தில் பாலாஜிக்கு கொடுத்தார். தற்போது ஈரோடு கிழக்கிலும் அதிருப்தி அதிமுகவினரை திமுகவுக்கு கொண்டு வந்தால், வெற்றியில் அவரது பங்கு கணிசமாக இருப்பதாக ஒரு தோற்றம் உருவாகிவிடும். அதன்பின்னர் எலெக்‌ஷன் எக்ஸ்பெர்ட் என அவருக்கு பெயர் சூட்டி, தமிழ்நாட்டில் எங்கு எந்த தேர்தல் என்றாலும் அவரைக் கூப்பிடுங்கள் என்று மேலிடத்தை கூற வைத்துவிடுவார். அதனால் அவரது விஷயத்தில் ஜாக்கிரதையாக இருக்க வேண்டும் என்று சீனியர்கள் மைக்கை ஆஃப் செய்துவிட்டு தங்களுக்குள் பேசிக்கொள்வதாக சொல்கிறார்கள்.