மரியாதை நிமித்தமான சந்திப்பே: தேமுதிக விளக்கம்

சென்னை: விஜயகாந்தை தமிழக பாஜக தேர்தல் பொறுப்பாளரும், மத்திய அமைச்சருமான பிரகாஷ் ஜவடேகர் சந்தித்தது மரியாதை நிமித்தமாகவே என்று தேமுதிக விளக்கம் அளித்துள்ளது.

தமிழகத்தில் கடந்த நாடாளுமன்றத் தேர்தலில் அமைக்கப்பட்ட தேசிய ஜனநாயகக் கூட்டணியைத் தக்க வைக்க பாஜக கடும் முயற்சி மேற்கொண்டு வருகிறது. இதற்காக, பாஜகவின் தமிழகத் தேர்தல் பொறுப்பாளராக நியமிக்கப்பட்டுள்ள மத்திய சுற்றுச்சூழல்துறை அமைச்சர் பிரகாஷ் ஜவடேகர், சென்னையில் 2 நாட்கள் முகாமிட்டு பல்வேறு கட்சித் தலைவர்களுடன் பேச்சுவார்த்தை நடத்தினார்.

இதன் ஒருபகுதியாக சாலிகிராமத்தில் உள்ள தேமுதிக தலைவர் விஜயகாந்தின் வீட்டில், அவரைச் சந்தித்துப் பேச்சுவார்த்தை நடத்தினார். இந்த சந்திப்பின் போது பாஜக தமிழகத் தலைவர் தமிழிசை சவுந்திரராஜன் உள்ளிட்ட நிர்வாகிகள் உடனிருந்தனர்.

சந்திப்புக்குப் பிறகு செய்தியாளர்களிடம் பேசிய பிரகாஷ் ஜவடேகர், விஜயகாந்துடனான சந்திப்பு மகிழ்ச்சிகரமானதாக இருந்ததாகத் தெரிவித்தார்.

பாஜக கூட்டணிக்கு விஜயகாந்த் கடும் நிபந்தனைகள் விதித்தாகாக் கூறப்பட்ட நிலையில், ஜவடேகர்- விஜயகாந்த் சந்திப்பு மரியாதை நிமித்தமானதே என்று தேமுதிக வெளியிட்டுள்ள செய்திக் குறிப்பில் விளக்கம் அளிக்கப்பட்டுள்ளது.

பாஜக தலைமையிலான தேசிய ஜனநாயக் கூட்டணியில் தேமுதிக இடம் பெரும் என்று பிரகாஷ் ஜவடேகர் நம்பிக்கை தெரிவித்த நிலையில், கூட்டணி குறித்த இறுதி அறிவிப்பு முடிச்சை அவிழ்க்காமல் விஜயகாந்த் மவுனம் காத்து வருகிறார்.