தமிழக ஆளுநர் பதவிக்கு கல்ராஜ் மிஸ்ரா ரெடி!

தமிழகத்தின் முழுநேர ஆளுநராக கல்ராஜ் மிஸ்ரா நியமிக்கப்படலாம் என்று தகவல் வெளியாகியுள்ளது.

முன்னாள் தமிழக ஆளுநர் ரோசய்யாவின் பதவிக்காலம் கடந்த 2016ஆம் ஆண்டு ஆகஸ்ட் மாதம் முடிந்தது. இதற்குப் பிறகு ஆகஸ்ட் 31ம் தேதி மகாராஷ்டிர மாநில ஆளுநரான வித்யாசகர் ராவ் தமிழகத்தின் பொறுப்பு ஆளுநராக நியமிக்கப்பட்டார். பின்னர் இதுவரை ஓராண்டுக்கும் மேலாக தமிழகத்திற்கு நிரந்தர ஆளுநர் நியமிக்கப்படவில்லை.

இச்சூழலில், மத்திய சிறு, குறு மற்றும் நடுத்தர தொழில்கள் துறை அமைச்சர் பதவியை ராஜினாமா செய்த கல்ராஜ் மிஸ்ரா தமிழகத்தின் முழுநேர ஆளுநராக நியமிக்கப்படலாம் என்று தகவல் வெளியாகியுள்ளது. உத்தரப் பிரதேசத்தைச் சேர்ந்த கல்ராஜ் மிஸ்ரா 75 வயதைக் கடந்துவிட்டதால் அவருக்கு பணிச்சுமை அதிகம் இல்லாத பொறுப்பை அளிக்கும் விதமாக அமைச்சர் பதவிக்கு பதில் ஆளுநர் பதவி அளிக்க முடிவுசெய்யப்பட்டதாக கூறப்படுகிறது.

மத்திய அமைச்சரவை மாற்றம் நடைபெற்றபோதே காலியாக உள்ள பல்வேறு மாநிலங்களின் ஆளுநர் பதவிகளும் நிரப்பப்படும் என்று எதிர்பார்க்கப்பட்டது. ஆனால், அவ்வாறு நடைபெறவில்லை. எனவே, பிரதமர் நரேந்தர மோடி தனது சீனா மற்றும் மியான்மர் பயணத்தை முடித்துக்கொண்டு நாடு திரும்பியதும் முழுநேர ஆளுநர் இல்லாத அனைத்து மாநிலங்களுக்கும் ஆளுநர்கள் நியமிக்கப்படுவார்கள் என்று எதிர்பார்க்கப்படுகிறது.