'தமிழக மக்களுக்காக உங்கள் குரல் ஒலித்திட'... ஸ்டாலினுக்கு கமல் பிறந்தநாள் வாழ்த்து!!

திமுக தலைவர் மு.க.ஸ்டாலினுக்கு இன்று (மார்ச் 1) 68 ஆவது பிறந்த நாள். இந்த தருணத்தில் திமுக பொதுச் செயலாளர் அன்பழகன் உடல்நலக் குறைவு காரணமாக மருத்துவமனையில் அனுமதிக்கப்பட்டுள்ளார். சில தினங்களுக்கு முன்பு அவரை நேரில் சந்தித்து ஸ்டாலின் நலம் விசாரித்தார்.

"கட்சியின் மூத்த தலைவர்களில் ஒருவரான அன்பழகன் மருத்துவமனையில் அனுமதிக்கப்பட்டிருப்பதன் காரணமாக, தமது பிறந்த நாளில் கொண்டாட்டங்கள் எதுவும் வேண்டாம்" என்று திமுக தொண்டர்களை ஸ்டாலின் கேட்டு கொண்டிருந்தார்.

என்ன ஆச்சு க.அன்பழகனுக்கு?- சென்னை அப்போலோ மருத்துவமனையில் திடீர் அனுமதி!

இதனால், சென்னை தேனாம்பேட்டையில் உள்ள அண்ணா அறிவாலயம், அன்பகம், கோபாலபுரத்தில் உள்ள கருணாநிதியின் வீடு என எங்கும் இன்று, ஸ்டாலின் பிறந்த நாளையொட்டி கொண்டாட்டங்கள் களைகட்டவில்லை.

இந்த நிலையில், மக்கள் நீதி மய்யம் கட்சியின் தலைவர் கமல் ஹாசன், ஸ்டாலினுக்கு பிறந்த நாள் வாழ்த்து தெரிவித்துள்ளார்.

இதுதொடர்பாக அவர் வெளியிட்டுள்ள ட்விட்டர் பதிவில், "அன்பு சகோதரர் மு.க.ஸ்டாலின் அவர்களுக்கு இனிய பிறந்த நாள் வாழ்த்துக்கள். தமிழகத்தில் நடக்கும் அநீதிகளுக்கு எதிராகவும், மக்களுக்காகவும் உங்கள் குரல் இன்னும் நிறைய நாட்கள் ஒலித்திட, என் மனமார்ந்த வாழ்த்துக்கள்" என கமல் ஹாசன் வாழ்த்தியுள்ளார்.