காலில் அறுவை சிகிச்சை: மருத்துவ விடுப்பில் செல்லும் கமல் ஹாசன்!

தமிழகத்தில் எதிர்வரவுள்ள சட்டமன்ற தேர்தலை முன்னிட்டு, மக்கள் நீதி மய்யம் கட்சித் தலைவர் கமல்ஹாசன் தீவிர பிரசாரம் மேற்கொண்டு வருகிறார். தனது பிரசாரக் கூட்டங்களில் ஆளும் அதிமுக அரசையும், மத்திய பாஜக அரசையும் கடுமையாக விமர்சித்து வருகிறார்.

அதேசமயம், தன்னை பகுத்தறிவாதியாகவும், இடது சிந்தனை கொண்டவராகவும் காட்டிக் கொள்ளும் கமல் ஹாசன், பாஜகவின் ‘பி’ டீம் என்று விமர்சிக்கப்பட்டு வருகிறார். ஆனால், தான் யாருக்கும் பி டீம் அல்ல என்றும், காந்தியின் பி டீம் என்றும் கமல் விளக்கமளித்துள்ளார்.

இந்த நிலையில், தனது காலில் அறுவை சிகிச்சை செய்யவிருப்பதாகவும் மக்களை இனிமெல் ஆன்லைன் மூலமாக மட்டுமே சில நாட்கள் சந்திக்கவிருப்பதாகவும் மக்கள் நீதி மய்யம் கட்சித் தலைவர் கமல்ஹாசன் தெரிவித்துள்ளார்.


இதுகுறித்து அவர் வெளியிட்டுள்ள அறிக்கையில், “சில ஆண்டுகளுக்கு முன்னர் ஏற்பட்ட விபத்தில் காலில் அறுவை சிகிச்சை செய்திருந்தேன். மேலும் ஒரு அறுவை சிகிச்சை செய்ய வேண்டி இருந்தது. பிரச்சாரத்தை தொடங்கும்போதே காலில் வலி இருந்தது. இப்போது ஓய்வு கிடைத்துள்ளதால் அறுவை சிகிச்சை செய்ய உள்ளேன்” என்று தெரிவித்துள்ளார்.