திமுக தலைவர் கருணாநிதியின் உடல்நிலை மோசமானதைத் தொடர்ந்து, காவேரி மருத்துவமனை முன் திமுக தொண்டர்கள் குவிந்தபடி உள்ளனர். இதனால், அங்கு பாதுகாப்பு பலப்படுத்தப்பட்டுள்ளது.
திமுக தலைவர் கருணாநிதிக்கு கடந்த சில தினங்களுக்கு முன் உடல்நிலை மோசமாக பாதிக்கப்பட்டது. இதையடுத்து, கருணாநிதியின் கோபாலபுரம் இல்லத்தில் அவருக்கு தீவிர சிகிச்சை அளிக்கப்பட்டு வந்தது.
இதைத் தொடர்ந்து கடந்த 10 நாட்களுக்கு முன், அவரின் உடல்நிலை மேலும் மோசமடைந்ததால், காவேரி மருத்துவமனைக்கு ஆம்புலன்சில் அழைத்துச் செல்லப்பட்டார். மருத்துவமனையில் சிகிச்சைப் பெற்று வந்த கருணாநிதியை, காங்கிரஸ் கட்சி தலைவர் ராகுல் காந்தி, குடியரசு தலைவர் ராம்நாத் கோவிந்த், துணை குடியரசு தலைவர் வெங்கையா நாயுடு, ஆளுநர் பன்வாரிலால் புரோஹித், தமிழக முதல்வர் எடப்பாடி பழனிச்சாமி, துணை முதல்வர் ஓ. பன்னீர்செல்வம் உள்ளிட்ட பல அரசியல் கட்சித் தலைவர்கள் உடல்நலம் குறித்து விசாரித்துச் சென்றனர்.
அதேபோல், சினிமா பிரபலங்களான ரஜினி, கமல், விஜய், அஜித், விஷால், சூர்யா, சிவகுமார், சிவகார்த்திகேயன் உள்ளிட்ட பல சினிமா பிரபலங்களும் கருணாநிதியின் உடல்நலம் குறித்து விசாரித்துச் சென்றனர்