கூவத்தூர் தனியார் விடுதி 2 நாட்களுக்கு மூடல்!

அதிமுக எம்எல்ஏக்கள் தங்கியிருந்த கூவத்தூர் தனியார் விடுதி பராமரிப்பு பணிகளுக்காக இரண்டு நாட்கள் மூடப்படுவதாக விடுதி நிர்வாகம் அறிவித்துள்ளது.

சசிகலா ஆதரவு எம்எல்ஏக்கள் அனைவரும் கடந்த 11 நாட்களாக காஞ்சிபுரம் மாவட்டம் கிழக்கு கடற்கரை சாலையில் அமைந்துள்ள கோல்டன் பே ரெசார்டில் தங்கியிருந்தனர். விடுதியின் உள்ளே எல்லா வசதிகளும் வழங்கப்பட்ட வந்த நிலையில் இன்று (18.02.17) தனது பெரும்பான்மையை நிரூபிப்பதற்காக முதலமைச்சர் எடப்பாடி பழனிச்சாமி உடன் அத்தனை எம்எல்ஏக்களும் சட்டப்பேரவைக்கு காலை 10 மணிக்கு வந்தனர். ஆனால் சட்டப்பேரவையில் எதிர்க்கட்சியான திமுக கடும் அமளியில் ஈடுபட்டதால் சட்டப்பேரவை இரண்டு முறை ஒத்திவைக்கப்பட்டது. பிற்பகல் 3 மணிக்கு சட்டப்பேரவையில் நம்பிக்கை வாக்கெடுப்பு நடத்தப்படும் என்று எதிர்பார்க்கப்படுகிறது.

இந்நிலையில் எம்எல்ஏக்கள் தங்கியிருந்த தனியார் விடுதி 2 நாட்கள் மூடப்படுவதாக விடுதி நிர்வாகம் அறிவித்துள்ளது. பராமரிப்பு பணிகள் மேற்கொள்ள இருப்பதால் விடுதி மூடப்படுவதாக விடுதி நிர்வாகத்தினர் அறிவித்துள்ளனர்.