லிஸ்ட் ரெடி பண்ணியாச்சா?- மாநிலங்களவைக்கு செல்லும் திமுக எம்.பிக்கள் யார் தெரியுமா!

மக்களவை மற்றும் இடைத்தேர்தல் முடிவில், தமிழகத்தில் 37 மக்களவை மற்றும் 13 சட்டமன்ற தொகுதிகளில் திமுக வெற்றி பெற்றது. இதன்மூலம் தமிழக சட்டமன்றத்தில் திமுக கூட்டணி கட்சி உறுப்பினர்கள் எண்ணிக்கை 109ஆக உயர்ந்துள்ளது. இந்நிலையில் வரும் ஜூலை மாதம் தமிழகத்தின் 6 மாநிலங்களவை எம்.பிக்கள் சீட் காலியாகிறது.

எனவே அதிமுக மற்றும் திமுகவிற்கு தலா 3 எம்.பிக்கள் மாநிலங்களவைக்கு செல்லும் வாய்ப்பு ஏற்பட்டுள்ளது. தேர்தலுக்கு முந்தைய கூட்டணி ஒப்பந்தத்தின் படி, மதிமுகவிற்கு ஒரு மாநிலங்களவை சீட் வழங்கப்படும் என்று திமுக அறிவித்திருந்தது. அதைப் பயன்படுத்திக் கொண்டு மதிமுக பொதுச் செயலாளர் வைகோ மாநிலங்களவைக்கு செல்ல அதிக வாய்ப்புள்ளது.

மீதம் இரு சீட்கள் இருக்கின்றன. அவற்றில் ஒன்றை முன்னாள் பிரதமர் மன்மோகன் சிங்கிற்கு அளிக்க முயற்சி நடப்பதாக கூறப்படுகிறது. ஏனெனில் மாநிலங்களவையில் அவரது பதவிக் காலம் விரைவில் முடிவடைகிறது. ஆகையால் அவருக்கு மீண்டும் வாய்ப்பளிக்க தமிழகத்தை பயன்படுத்திக் கொள்ள காங்கிரஸ் திட்டமிட்டுள்ளது.

ஆனால் மக்களவை தேர்தலில் 10 தொகுதிகளை காங்கிரஸிற்கு ஒதுக்கிவிட்டதால், மாநிலங்களவை சீட் எதற்காக என்று திமுக தலைமை கருதுகிறது. அக்கட்சியின் முக்கிய நிர்வாகிகளும் எஞ்சிய 3 சீட்டையும், திமுகவிற்கே ஒதுக்க வேண்டும் என்று கோரிக்கை விடுத்துள்ளனர். இதற்கான போட்டியில் இருப்பவர்கள் விவரம்:

1 - திமுக தொழிற்சங்கம் தொ.மு.ச பொதுச் செயலாளர் சண்முகம்

2 - திமுக வழக்கறிஞர் பிரிவு சட்ட ஆலோசகர் என்.ஆர்.இளங்கோ

3 - திமுக செய்தித் தொடர்புத் துறை செயலாளர் கான்ஸ்டான்டைன் ரவீந்திரன்

4 - திமுக துணைப் பொதுச் செயலாளர் சுப்புலட்சுமி ஜெகதீசன்

5 - ஈரோடு முத்துசாமி

6 - திமுக செய்தித் தொடர்பாளர் கே.எஸ்.ராதாகிருஷ்ணன்

மேற்கூறியவர்களின் பெயர்களில் இருந்து, உரியவர்களை மாநிலங்களவைக்கு தேர்ந்தெடுக்கும் பணியை திமுக தலைமை மேற்கொண்டு வருகிறது.