மதுரையில் மே-10-ல் உள்ளூர் விடுமுறை

மதுரை: வைகை ஆற்றில் கள்ளழகர் இறங்குவதை முன்னிட்டு வருகிற 10-ம் தேதி மதுரை மாவட்டத்திற்கு உள்ளூர் விடுமுறை விடப்படும் என அம்மாவட்ட ஆட்சியர் வீரராகவ ராவ் அறிவித்துள்ளார்.

உலக பிரசித்தி பெற்ற மதுரை மீனாட்சி அம்மன் கோயில் சித்திரை திருவிழா, தங்க முலாம் பூசப்பட்ட கொடி கம்பத்தில் வேத மந்திரங்கள், மேளதாளம் முழங்க, மதுரை குலுங்க கொடியேற்றத்துடன் கடந்த மாதம் 28-ம் தேதி தொடங்கியது.

யானை, குதிரை, ஒட்டகங்கள், மாடு, கோலாட்டம், நாதஸ்வர கலைஞர்கள், ஒயிலாட்டம் போன்ற பல்வேறு பரிவாரங்களுடன் மீனாட்சி அம்மன் சுந்தரேசுவரர் வீதியுலா வரும் நிகழ்ச்சி என கொடி ஏற்றத்தை தொடர்ந்து, மதுரையே விழாக்கோலம் பூண்டுள்ளது.

மே 5-ம் தேதி இரவு (நாளை) அம்மன் சன்னதி ஆறுகால் பீடத்தில் மீனாட்சி அம்மனுக்கு பட்டாபிஷேகம் நடைபெறுவதுடன், அம்மனுக்கு கிரீடம் அணிவித்து செங்கோல் வழங்கப்படும். மே 6-ம் தேதி திக்குவிஜயம் நடைபெறும். மீனாட்சி அம்மன் கோயில் சித்திரை திருவிழாவின் முக்கிய நிகழ்வான மீனாட்சி - சுந்தரேசுவரர் திருக்கல்யாணம் வருகிற மே 7-ம் தேதி காலை 8.35 மணி முதல் 8.59 மணிக்குள் நடைபெறவுள்ளது.

அதேபோல், மற்றொரு முக்கிய நிகழ்வான உலகபிரசித்தி பெற்ற கள்ளழகர், வைகை ஆற்றில் இறங்கும் நிகழ்ச்சி வருகிற 10-ம் தேதி நடைபெறவுள்ளது. இதற்கு மதுரை மற்றும் அதன் சுற்று வட்டாரப் பகுதிகள் மட்டுமின்றி, மதுரை திணறும் அளவிற்கு உலகம் முழுவதிலும் இருந்து ஏராளமான பக்தர்கள் வருகை புரிவர்.

இந்நிலையில், கள்ளழகர் வைகை ஆற்றில் இறங்கும் நிகழ்ச்சியை முன்னிட்டு வருகிற 10-ம் தேதி மதுரை மாவட்டத்திற்கு உள்ளூர் விடுமுறை விடப்படும் என அம்மாவட்ட ஆட்சியர் வீரராகவ ராவ் அறிவித்துள்ளார்.
Local holiday for May 10th in Madurai: Collector announces