சுற்றுலா சொகுசு ரயில் மகாராஜா எக்ஸ்பிரஸ் தமிழகம் வருகை!

சுற்றுலா சொகுசு ரயிலான மகாராஜா எக்ஸ்பிரஸ் தமிழகம் வர உள்ளது.

உலக அளவில் புகழ்பெற்ற மகாராஜா விரைவு ரயில் என்கிற சுற்றுலா ரயிலை ஐஆர்சிடிசி இயக்கி வருகிறது. மிக அதிநவீன வசதிகள் கொண்ட இந்த ரயிலில் தங்கத் தட்டில் உணவு வழங்கப்படுவது குறிப்பிடத்தக்கது. இதுவரை மும்பையில் இருந்து ஜெய்ப்பூர், ஜோத்பூர், ஆக்ரா உள்ளிட்ட வடமாநில நகரங்களுக்கு இயக்கப்பட்ட இந்த ரயில் முதன்முறையாகத் தென் மாநிலங்களுக்கு வருகிறது.

இதன்படி, திருவனந்தபுரத்தில் இருந்து காரைக்குடி, செட்டிநாடு வழியாக மும்பைக்கு மகாராஜா விரைவு ரயில் இயக்கப்பட உள்ளதாக, ஐஆர்சிடிசி கூறியுள்ளது.

திருவனந்தபுரத்தில் இருந்து ஜூலை ஒன்றாம் தேதி புறப்படும் இந்த ரயில் காரைக்குடி, செட்டிநாடு, சென்னை, மைசூர், கோவா வழியாக மும்பை வரை செல்கிறது.

இதற்கான கட்டணம் லட்சக் கணக்கில் நிர்ணயிக்கப்பட்டுள்ளது. டீலக்ஸ் கேபின் கட்டணம், ரூ. 5,00,680 ஆகும். இதேபோன்று, ஜூனியர் சூட் வகுப்புக்கு ரூ.7,23,420, சூட் வகுப்புக்கு ரூ.10,09,330 என்றும், பிரசிடென்சியல் சூட் வகுப்புக்கு ரூ.17,33,410 என்றும் கட்டணம் நிர்ணயிக்கப்பட்டுள்ளது.

ஒருவருக்கு இந்தக் கட்டணம் செலுத்தினால் உடன் வரும் ஒருவர் கட்டணமில்லாமல் இலவசமாகப் பயணிக்கலாம். இதில் ரயில் கட்டணம், எட்டு நாட்களுக்கான உணவுக் கட்டணம், வழியில் நட்சத்திர விடுதிகளில் தங்கும் கட்டணம், சுற்றுலாத் தலங்களுக்குச் சுற்றுலாப் பேருந்தில் செல்லும் கட்டணம், நுழைவுக் கட்டணம் ஆகிய அனைத்தும் அடங்கும்.

Luxury Train Maharaja Express is coming to Tamilnadu.