ஆர்.கே.நகர் இடைத்தேர்தல்: டிடிவி குற்றச்சாட்டுக்கு மது பதில்

சென்னை: ஆர்.கே.நகர் இடைத்தேர்தலில் அதிமுக புரட்சித்தலைவி அம்மா கட்சியினர் மின் கம்பம் சின்னத்தை இரட்டை இலை போல சித்தரிப்பதாக அளிக்கப்பட்ட புகாருக்கு அக்கட்சியின் வேட்பாளர் மதுசூதனன் பதில் கூறியுள்ளார்.

ஆர்.கே.நகர் இடைத்தேர்தல் பிரச்சாரத்தில் அதிமுக அம்மா கட்சி தங்கள் சின்னத்தை மாற்றிச்சித்தரிப்பதாக, அதிமுக அம்மா கட்சி வேட்பாளர் டிடிவி தினகரன் சார்பில் தேர்தல் ஆணையத்திடம் புகார் அளிக்கப்பட்டது.

இப்புகாருக்கான பதிலை அதிமுக புரட்சித்தலைவி அம்மா கட்சியின் வேட்பாளர் மதுசூதனன் இன்று தேர்தல் ஆணையத்திடம் சமர்ப்பித்தார்.

தனது பதிலில், அதிமுக புரட்சித்தலைவி அம்மா கட்சியினர் மின் கம்பம் சின்னத்தை தவறாக சித்தரிக்கவில்லை என்று அவர் மறுப்பு கூறியுள்ளார். மேலும், டிடிவி தினகரன் தான் தேர்தல் பிரச்சாரத்திற்காக இரட்டை இலை சின்னத்தையும் அதிமுகவின் பெயரையும் முறைகேடாக பயன்படுத்திவருவதாகவும் அவர் குற்றம்சாட்டியுள்ளார்.

இது குறித்து கூடுதல் விளக்கம் தேவைப்பட்டால் நேரில் வந்து பதிலளிக்கவும் தயாராக இருப்பதாகவும் அவர் தெரிவித்துள்ளார். இந்த பதிலை முதற்கட்ட பதிலாகவே கருத வேண்டும் என்றும் டிடிவி தினகரனின் குற்றச்சாட்டுகளுக்கு ஆதரத்தை அளித்தால் அவற்றின் மீதான பதிலையும் கூறி தயாராக உள்ளதாகவும் மதுசூதனன் தேர்தல் ஆணையத்திடம் உறுதி கூறியிருக்கிறார்.