“பெண்கள் அழகு பொருட்கள் அல்ல” : மொட்டை அடித்துக்கொண்ட மனிதி அமைப்பு!

பெண்கள் என்பவர்கள் அழகு சாதனம் அல்ல எனும் விழிப்புணர்வை ஏற்படுத்தும் வகையில் மனிதி அமைப்பு முடி வெட்டி, மொட்டை அடித்துக்கொள்ளும் நிகழ்ச்சியை நடத்தியுள்ளது.

இது குறித்து பேசிய மனிதி ஒருங்கிணைப்பு குழுவில் ஒருவரான சுதா, அழகு என்பதன்அளவுகோல் ஆண்களுக்கும், பெண்களுக்கும் சரியான அளவில் இருக்கவேண்டும் என்றார். மேலும் நறுக்கிய முடி நன்மை தரட்டும் என்ற உணர்வில் புற்றுநோயால் பாதிக்கப்பட்டவர்களுக்கு அளிக்கும் நோக்கில் முன்வந்திருப்பதாகவும் கூறியுள்ளார்.

முடி வெட்டுவது புரட்சியா என்று கேட்பவர்களுக்கு, இது புரட்சியல்ல, ஒரு முன்னெடுப்பு என்று கூறிக்கொள்ள விரும்புகிறோம் என்றார். மனிதி ஒருங்கிணைப்பு குழுவின் உறுப்பினர் சாரதா ராமன் பேசும் போது, பெண்களுக்கு ஆதரவான வாட்ஸ் அப் குரூப்பாக தொடங்கப்பட்ட மனிதி அமைப்பு தற்போது பெண் விடுதலை குறித்து பேசும் அமைப்பாக வளர்ந்து வந்துள்ளது என்றார்.

ஒரு பெண் முற்போக்கான விஷயத்தை பேசுகிறார் என்றால் முதல் எதிர்ப்பு அவரின் வீட்டில் இருந்து தான் வரும். அதனால் பெரியாரின் கருத்துக்களை ஏந்தி இந்த நிகழ்வை நடத்துகிறோம் என்றும், இது குறித்து பெண்கள் சிந்திக்க தொடங்கினால் வெற்றி தான் என்றார்.