​ நீட் தோ்வு அடிப்படையில் 17ம் தேதி மருத்துவ கலந்தாய்வு?

எம்.பி.பி.எஸ்., பி.டி.எஸ். படிப்புகளுக்கான கலந்தாய்வு நீட் தோ்வு அடிப்படையில் வரகிற 17ம் தேதி நடத்தப்படலாம் என்று கூறப்படுகிறது.

தமிழகத்தில் அரசு மற்றும் அரசு ஒதுக்கீட்டின் கீழ் உள்ள இளநிலை மருத்துவ படிப்புகளான எம்.பி.பி.எஸ். மற்றும் பி.டி.எஸ். படிப்புகளுக்கு பிளஸ் 2 மதிப்பெண் அடிப்படையில் மாணவா் சேர்க்கை நடைபெற்று வந்தது. இந்நிலையில் நடப்பு கல்வியாண்டு முதல் நீட் தேர்வு அடிப்படையில் மாணவர் சேர்க்கை நடைபெறும் என்று மத்திய அரசு அறிவித்தது.

இதன் காரணமாக பல்வேறு சர்ச்சைகளுக்கு மத்தியில் நீட் தேர்வு நடத்தப்பட்டு முடிவுகளும் அறிவிக்கப்பட்டன. ஆனால் நீட் தேர்வு கேள்விகளில் தமிழ் மொழியில் கேட்கப்பட்ட கேள்விகள் மிகவும் கடினமாக இருந்ததாக வழக்கு தொடரப்பட்டது. இதனால் நீட் முடிவுகளை வெளியிட உயர்நீதிமன்ற மதுரைக்கிளை தடை விதித்தது.
ஆனால் உச்சநீதிமன்றத்தில் மேல்முறையீடு செய்து சி.பி.எஸ்.இ. நீட் முடிவுகளை அறிவித்தது. இந்நிலையில் நீட் தேர்வுக்கு விலக்கு கோரி தொடர்ந்து தமிழக அரசு மத்திய அரசிடம் வலியுறுத்தி வருகிறது. இதுவரை தமிழகத்திற்கு சாதகமான பதில் கிடைத்தபாடில்லை. மேலும் மாநில பாடத் திட்டத்தில் படித்தோருக்கு 85 சதவீத உள் இடஒதுக்கீடு அறிவித்து பிறப்பிக்கப்பட்ட அரசாணைக்கும் தடை விதிக்கப்பட்டுள்ளது.

பொறியியல் கலந்தாய்வு நேற்றுடன் முடிக்கப்பட்ட நிலையில் இரண்டாம் கட்ட துணை கலந்தாய்வு ஆகஸ்ட் 17ம் தேதி நடைபெறும் என்று அறிவிக்கப்பட்டுள்ளது. இந்நிலையில் மருத்துவ கலந்தாய்வும் ஆகஸ்ட் 17ம் தேதி நடைபெறலாம் என்று தகவல்கள் வெளியாகியுள்ளன. மருத்துவ கலந்தாய்வை வழக்கமான முறையில் நடத்த மாநில அரசு மேற்கொண்ட எந்த நடவடிக்கைக்கும் வெற்றி கிடைத்தபாடில்லை. இந்நிலையில் நீட் தேர்வு அடிப்படையிலேயே மருத்துவ கலந்தாய்வு நடத்தப்படும் என்று கூறப்படுகிறது.

மருத்துவ மாணவர்களுக்கான தரவரிசைப் பட்டியல் ஓரிரு நாட்களில் வெளியிடப்படும் என்று சுகாதாரத்துறை செயலாளர் ராதாகிருஷ்ணன் கூறியிருப்பது குறிப்பிடத்தக்கது. ஏற்கனவே தரவரிசைப் பட்டியல் வெளியிடப்படும் என்று அறிவிக்கப்பட்டு அது தள்ளிப் போனது நிலையில் இந்த அறிவிப்பு வந்துள்ளது.

மாநில பாட திட்டத்தின் கீழ் கல்வி பயின்ற மாணவா்கள் நீட் தோ்வில் இருந்து விலக்கு கிடைத்து, மாநில பாட திட்டத்தின் கீழ் மருத்துவ கலந்தாய்வு நடைபெறும் என்று காத்திருந்த நிலையில் ஏமாற்றமே பதிலாக கிடைக்குமோ என்ற அச்சத்தில் அனைவரும் உள்ளனா்.

Medical Counseling on the basis of Retreat on Neet?