விஜயபாஸ்கர் லஞ்சம் வாங்கவில்லை: தந்தை விளக்கம்

அமைச்சர் விஜயபாஸ்கர் லஞ்சம் வாங்கியதாக தான் வாக்குமூலம் அளித்ததாக பரவும் செய்தியை அவரது தந்தை மறுத்துள்ளார்.

தமிழ்நாடு சுகாதாரத்துறை அமைச்சர் விஜயபாஸ்கர் மீது ஆர்.கே.நகர் இடைத்தேர்தல் தேதி அறிவிக்கப்பட்டபோது ஊழல் குற்றச்சாட்டு எழுந்தது. அவரது வீட்டில் வருமான வரித்துறை அதிகாரிகள் சோதனை மேற்கொண்டனர்.

அப்போது, அவரது தந்தை சின்னசாமியிடம் வருமான வரித்துறை அதிகாரிகள் விசாரணை மேற்கொண்டபோது, தமிழக அரசுப் பணியில் வேலை வாங்கிக் கொடுப்பதாக தனது மகன் விஜயபாஸ்கரும், அவரது உதவியாளர்களும் பலரிடம் தலா ரூ.12 லட்சம் லஞ்சம் வாங்கினர் என வாக்குமூலம் அளித்தார் என செய்தி பரவி வருகிறது.

இந்நிலையில் இது குறித்து விளக்கம் அறித்து அறிக்கை வெளியிட்டுள்ள அமைச்சர் விஜயபாஸ்கரின் தந்தை சின்னசாமி, ஊடகங்களில் வந்தது போன்று வருமானவரித்துறையிடம் வாக்குமூலம் அளிக்கவில்லை எனவும் உண்மைக்கு புறம்பாக தவறான தகவல்கள் பரப்பபடுகிறது எனவும் தெரிவித்துள்ளார். மேலும், எனது குடும்பம் சட்டப்படி செலுத்த வேண்டிய வருமான வரியை முறையாக செலுத்துவதாகவும் கூறியுள்ளார்.