தமிழக முதல்வருடன் மு.க.ஸ்டாலின் உள்ளிட்ட திமுக நிர்வாகிகள் திடீர் சந்திப்பு!

சென்னை: திமுக செயல் தலைவர் மு.க.ஸ்டாலின், தமிழக முதல்வர் பழனிசாமியை இன்று திடீரென சந்தித்துள்ளார்.

திமுக தலைவராக கருணாநிதி 50 ஆண்டுகளைக் கடந்துள்ளார். இந்த சூழலில் வயது மூப்பின் காரணமாக, தொடர்ந்து உடல்நிலை பாதிக்கப்பட்டு வருகிறார். கடந்த ஜூலை 27ஆம் தேதி நள்ளிரவு, ரத்த அழுத்தக் குறைவு காரணமாக உடனடியாக மருத்துவமனையில் அனுமதிக்கப்பட்டார்.

இதையடுத்து மருத்துவ சிகிச்சைக்கு கருணாநிதியின் உடல் ஒத்துழைப்பு அளித்து வந்தது. ஆனால் நேற்று வெளியிடப்பட்ட அறிக்கையில், உடல்நிலை மிக மோசமாக இருப்பதாக கூறப்பட்டது. 24 மணி நேரத்திற்கு பின்னரே, எதுவும் சொல்ல முடியும் என்று மருத்துவமனை நிர்வாகம் தெரிவித்துவிட்டது.

இன்று காலை முதலே தொண்டர்கள் வருகை அதிகரித்து வருகிறது. இதனால் காவல்துறையினரும் ஏராளமானோர் தொடர்ந்து குவிக்கப்பட்டு வருகின்றனர்.

இந்நிலையில் தமிழக முதலமைச்சர் பழனிசாமியை, திமுக செயல் தலைவர் மு.க.ஸ்டாலின், மு.க.அழகிரி, கனிமொழி, டி.ஆர்.பாலு உள்ளிட்டோர் கிரீன்வேஸ் சாலை இல்லத்தில் சந்தித்து பேசினர். 20 நிமிடங்கள் நீடித்த சந்திப்பிற்கு பின், திமுக நிர்வாகிகள் மீண்டும் காவிரி மருத்துவமனைக்கு திரும்பினர்.

இதனால் தொண்டர்கள் மத்தியில் பெரும் பதற்றம் ஏற்பட்டுள்ளது. விரைவில் கருணாநிதி உடல்நிலை குறித்த அறிக்கை வெளியிடப்படும் என்று கூறப்படுகிறது.

MK Stalin including DMK leaders met TN CM Palanisami today.