ஸ்டாலினும், ரஜினியும் ஒண்ணுதான்: இப்படி நினைச்சிருந்தாரா கமல்?

கமலின் ராஜ்கமல் ஃபிலிம்ஸ் இண்டர்நேஷனல் தயாரிப்பில், லோகேஷ் கனகராஜ் இயக்கத்தில் நடிகர் கமல்ஹாசன், பகத் பாசில், விஜய்சேதுபதி உள்ளிட்ட பலர் நடிப்பில் உருவாகியுள்ள திரைப்படம் விக்ரம். இந்த படத்தின் விநியோகஸ்த உரிமையை உதயநிதி ஸ்டாலினின் ‘ரெட் ஜெயண்ட்; நிறுவனம் வாங்கி இருக்கிறது.

ஜூன் 3ம் தேதி திரையரங்குகளில் நேரடியாக வெளியாகவுள்ள இப்படத்தின் முதல் பாடலான 'பத்தல பத்தல' கடந்த 11ஆம் தேதி வெளியானது. கமல்ஹாசன் எழுதி பாடியிருந்த இந்த பாடல் ரசிகர்கள் மத்தியில் வரவேற்பைப் பெற்றாலும், அதில் இடம்பெற்றிருந்த வரிகள் சர்ச்சையை ஏற்படுத்தியுள்ளது.

இந்த நிலையில், விக்ரம் திரைப்படத்தின் இசை மற்றும் டிரைலர் வெளியீட்டு விழா சென்னை நேரு உள் விளையாட்டு அரங்கில் நேற்று நடைபெற்றது. இதில், கமல்ஹாசன், விஜய்சேதுபதி, உதயநிதி ஸ்டாலின் உள்ளிட்ட பலர் கலந்து கொண்டனர்.

விழாவில் பேசிய கமல்ஹாசன், “தமிழ்நாட்டை பொறுத்தவரை சினிமாவும் அரசியலும் ஒட்டி பிறந்தவை. அதை தான் நானும் செய்கிறேன். நான் முழுமையான அரசியல்வாதியும் இல்லை நடிகனும் இல்லை. என் தகுதிக்கு மீறிய புகழை மக்களான நீங்கள் கொடுத்து இருக்கிறீர்கள். அதை நான் திருப்பி கொடுக்க வேண்டும். நான் பணத்துக்காக நடிக்க வந்திருந்தால் இது நடந்திருக்காது.

மொழி போராட்டங்கள் சுதந்திர காலத்தில் இருந்து நடந்து வருகிறது. இந்தியாவின் அழகே பன்முகம் தான். இந்தி ஒழிக என்று சொல்கிறீர்களா என்று கேட்காதீர்கள். நான் இந்தியும் தமிழும் சுமாராக தான் பேசுவேன். எந்த மொழியையும் ஒழிக என்று சொல்ல மாட்டேன். ஆனால், தமிழ் வாழ்க என்று சொல்வது என் கடமை. இதற்கும் அரசியலுக்கும் சம்பந்தமில்லை. தாய் மொழியை விட்டு கொடுக்கக் கூடாது.

அதிமுகவில் யாருக்கு ராஜ்யசபா சீட்? எடப்பாடி போடும் கணக்கு!
ஸ்டாலின் எனக்கு அரசியல் தாண்டிய நண்பர். ஏன் நானும் ரஜினியும் திரையில் இருந்தாலும் நண்பர்களாக இல்லையா. இளவயதில் நாங்கள் ஏதும் எதிராக பேசி இருக்கலாம். ஆனால், எங்கள் நட்பு எப்படி இருக்க வேண்டும், எப்படி பயணப்பட வேண்டும் என்பதை 25 வயதில் முடிவு செய்தவர்கள் நாங்கள். அது போல கலைஞரிடம் ஆரம்பித்த உறவு, அவரது பேரன் உதயநிதி வரை தொடர்கிறது.” என்றார். ரஜினிகாந்த் தனது போட்டியாளராக இருந்து கொண்டு நண்பராகவும் இருப்பதுபோல தான் முதல்வர் மு.க.ஸ்டாலினிடம் நட்பு பேணுவதாகவும் கமல்ஹாசன் தெரிவித்தார்.

முன்னதாக, விழாவில் பேசிய உதயநிதி ஸ்டாலின், “கடைசி நேரத்தில் ஓடும் ரயிலில் ஏறுவது போல தான் இந்த படத்தில் கடைசியில் இணைந்தேன். நிறைய பேர் என்னிடம் கமல்ஹாசனையே மிரட்டி படம் வாங்கி விட்டீர்களா என்று கேட்டார்கள். அவரை யாரும் மிரட்ட முடியாது. என்ன நடந்தது என்பது எனக்கும் கமல் சாருக்கு மட்டும் தான் தெரியும்.” என்றார்.