பாஜக-வுடன் அதிமுக கூட்டணி அமைக்க வேண்டும்: எம்எல்ஏ அதிரடி பேட்டி

கோவை: பாஜக-வுடன் அதிமுக கூட்டணி அமைக்க வேண்டும் என சூலூர் எம்எல்ஏ கனகராஜ் அதிரடி தெரிவித்துள்ளார்.

தமிழக முதல்வராக இருந்த ஜெயலலிதா மறைவுக்கு பின்னர், சசிகலா அணி, பன்னீர்செல்வம் அணி என அதிமுக இரண்டாக பிளவு கண்டது. இரு அணிகளையும் இணைக்கும் பேச்சுவார்த்தைக்கு அடிக்கல் நட்டப்பட்டு, குழு அமைக்கப்பட்டாலும் இதுவரை பேச்சுவார்த்தை என்பது நடைபெறவில்லை.

சசிகலா குடும்பத்தை கட்சியில் இருந்து அகற்ற வேண்டும் என்ற பன்னீர்செல்வம் அணியின் கோரிக்கையை சசிகலா அணியை சேர்ந்த சில மூத்த அமைச்சர்கள் ஏற்றுக் கொண்டுள்ளதாக கூறினர். மேலும், தினகரனும் ஒதுங்குவதாக அறிவித்தார். எனினும் சசிகலா மற்றும் தினகரனின் கட்சிப் பொறுப்புகள் அவர்கள் வசமே உள்ளன. சிலர் தினகரன் மற்றும் சசிகலாவுக்கு ஆதரவாக செயல்பட்டு தற்போது வரை வருவதால், பன்னீர்செல்வம் அணி, சசிகலா அணி, எடப்பாடி அணி என அதிமுக பிளவு கண்டுள்ளது.

இந்நிலையில், பாஜக-வுடன் அதிமுக கூட்டணி அமைக்க வேண்டும் என முதல்வர் எடப்பாடி பழனிச்சாமி அணியை சேர்ந்த மூத்த அமைச்சர் எஸ்பி வேலுமணியின் ஆதரவாளரான சூலூர் சட்டப்பேரவை உறுப்பினர் கனகராஜ் தெரிவித்துள்ளார்.

பாஜக-வுடன் அதிமுக தேர்தல் கூட்டணி வைக்குமா என்ற கேள்விக்கு பதிலளித்த அவர், மத்திய அரசுடன் மாநில அரசு இணக்கமாக இருக்க வேண்டும். அப்போது தான், நலத்திட்ட பணிகள் நடைமுறைப்படுத்தப்படும். அதற்கு பாஜக-வுடன் அதிமுக கூட்டணி வைக்க வேண்டும் என்றார்.

அமைச்சர் எஸ்பி வேலுமணியின் வழிகாட்டுதல் படி நடப்பேன் என அண்மையில் எம்எல்ஏ கனகராஜ் தெரிவித்திருந்ததால், அமைச்சரும் இதே நிலைப்பாட்டில் தான் உள்ளாரா என்ற கேள்விக்கு பதிலளிக்கும் போது, இது தனது தனிப்பட்ட கருத்து என்றும், மற்றவர்களின் கருத்துகளை தான் தெரிவிக்கவில்லை என்றும் கனகராஜ் குறிப்பிட்டார்.

தனது தொகுதியில் உள்ள குறிப்பிட்ட கல்குவாரியை மூடவில்லை எனில் சசிகலா அணியில் இருந்து விலகி விடுவேன் என பகிரங்க மிரட்டல் ஒன்றை கடந்த மார்ச் மாதத்தில் கனகராஜ் விடுத்தது நினைவிருக்கலாம்.

மேலும், எடப்பாடி பழனிச்சாமியே முதல்வராக தொடர வேண்டும் என அவரது ஆதரவாளர்கள் கூறி வரும் நிலையில், அணிகள் இணைப்புக்காக பன்னீர்செல்வத்தை முதல்வராக ஏற்றுக் கொள்ள தயார் என்றும் கனகராஜ் கூறியிருந்தார் என்பது குறிப்பிடத்தக்கது.
MLA bats for AIADMK – BJP alliance in TN