கு.க.செல்வத்தை கழட்டிவிட்ட திமுக: ஸ்டாலின் நடவடிக்கை!

ஆயிரம் விளக்கு சட்டமன்ற தொகுதி சட்டமன்ற உறுப்பினர் கு.க.செல்வம் திமுகவிலிருந்து நிரந்தரமாக நீக்கப்படுள்ளதாக மு.க.ஸ்டாலின் அறிவித்துள்ளார்.

திமுகவிலிருந்து விலகி பாஜகவில் ஐக்கியமாகியுள்ள வி.பி.துரைசாமிக்கு துணை தலைவர் பதவி வழங்கப்பட்டுள்ளது. அதைத் தொடர்ந்து மேலும் சில நிர்வாகிகளை பாஜக பக்கம் இழுக்கும் பணி நடைபெற்றுவருவதாக கூறப்பட்டு வந்த நிலையில் ஆயிரம் விளக்கு சட்டமன்ற தொகுதி உறுப்பினர் கு.க.செல்வம் டெல்லி சென்று பாஜக தலைவர்களை சந்தித்தார்.

பாஜகவில் இணையவுள்ளார் என அப்போதே கூறப்பட்ட நிலையில் தொகுதி நலனுக்காக அமைச்சரைப் பார்க்க வந்தேன் என ட்விஸ்ட் வைத்தார் கு.க.செல்வம். இதனால் திமுக தலைமை அவர் வகித்து வந்த பதவிகளிலிருந்து அவரை விடுவித்தது. இதனால் திமுகவின் அடிப்படை உறுப்பினராக மட்டுமே தொடர்ந்து வந்தார்.

அதிமுக அலுவலகத்தில் ஆலோசனை: தன் பலத்தை காட்டுகிறாரா ஓபிஎஸ்?

திமுகவில் தொடர்ந்தாலும் தமிழக பாஜகவுடனே இணைந்து செயல்பட்டு வந்தார் கு.க.செல்வம். கட்சி நீக்காதவரை அதிருப்தி எம்.எல்.ஏவாக தொடர்வார் என எதிர்பார்க்கப்பட்டது.

இந்நிலையில் இன்று திமுகவின் அடிப்படை உறுப்பினரிலிருந்தும் அவரை நீக்கி மு.க.ஸ்டாலின் உத்தரவிட்டுள்ளார். இது தொடர்பாக அவர் வெளியிட்ட அறிவிப்பில், “திமுக தலைமை நிலைய அலுவலகச் செயலாளர் மற்றும் தலைமைச் செயற்குழு உறுப்பினர் பொறுப்புகளிலிருந்து விடுவிக்கப்பட்ட கு.க. செல்வம் கட்சியின் கட்டுப்பாட்டை மீறியும், கட்சிக்கு அவப்பெயர் ஏற்படும் வகையிலும் செயல்பட்டு வந்ததால், அவரிடம் கேட்கப்பட்ட விளக்கத்துக்கு அளித்த பதில் ஏற்றுக் கொள்ளும்படி இல்லாத காரணத்தால், அவர் அடிப்படை உறுப்பினர் உள்ளிட்ட அனைத்துப் பொறுப்பிலிருந்தும் நிரந்தரமாக நீக்கி வைக்கப்படுகிறார்” தெரிவிக்கப்பட்டுள்ளது.