உயர்நீதிமன்ற தலைமை நீதிபதி அமர்வில் எம்.எல்.ஏ வெற்றிவேல் முறையீடு!

சென்னை: அதிமுக பொதுக் குழு தொடர்பாக உயர்நீதிமன்ற தலைமை நீதிபதி அமர்வில் டிடிவி அணி எம்.எல்.ஏ வெற்றிவேல் முறையீடு செய்துள்ளார்.

அதிமுகவில் பிளவுபட்டிருந்த ஓபிஎஸ்-ஈபிஎஸ் தலைமையிலான அணிகள் சமீபத்தில் ஒன்று சேர்ந்தன. இதையடுத்து நாளை அதிமுக பொதுக்குழு கூடும் என்று அறிவித்திருந்தனர்.

இதற்கு எதிர்ப்பு தெரிவித்து, டிடிவி தினகரன் ஆதரவு எம்.எல்.ஏ வெற்றிவேல், உயர்நீதிமன்றத்தில் வழக்கு தொடர்ந்தார்.

இந்த வழக்கை விசாரித்த நீதிமன்றம், அதிமுக அம்மா, அதிமுக புரட்சி தலைவி அம்மா அணிகளின் பொதுக் குழு கூட்டத்திற்கு தடையில்லை என்று உத்தரவிட்டது. மேலும் நீதிமன்ற நேரத்தை வீணடித்த காரணத்திற்காக எம்.எல்.ஏ வெற்றிவேலுக்கு ரூ.1 லட்சம் அபராதம் விதித்தது.

இந்நிலையில் தனி நீதிபதி உத்தரவை எதிர்த்து, தலைமை நீதிபதி அமர்வில் எம்.எல்.ஏ வெற்றிவேல் மேல்முறையீடு செய்துள்ளார்.

இந்த முறையீட்டை மனுவாக தாக்கல் செய்ய உயர்நீதிமன்ற தலைமை நீதிபதி இந்திரா பானர்ஜி உத்தரவிட்டுள்ளார். மேலும் மேல்முறையீட்டை அவசர வழக்காக விசாரிக்கவும் கோரிக்கை விடுத்துள்ளார்.

MLA Vetrivel applies HC chief Jusitice bench.