நீட் எழுதப் போறீங்களா, முதல இத தெரிச்சுக்கோங்க..!

“நீட் தேர்வை அதிமுக அரசு எதிர்க்கிறது, இது கட்சியின் நிலைப்பாடு, இதுகுறித்து மத்திய அரசிடம் நாங்கள் தொடர்ந்து அழுத்தம் கொடுப்போம், அதே நேரத்தில் நீட் தேர்வு இப்போது நடத்தப்படுகிறது. அதற்காக மாணவர்களைத் தயார்ப் படுத்த வேண்டும்” எனத் தமிழக அமைச்சர்கள் தொடர்ந்து கூறிவருகின்றனர். மருத்துவப் படிப்புகளில் மாணவர்களைச் சேர்க்கையை நடத்த நாடு முழுவதும் நீட் என்ற ஒற்றைத் தேர்வுமுறை கொண்டுவரப்பட்டு, தொடர்ந்து 2 ஆண்டுகளாக தேர்வுகள் நடத்தப்படுகிறது.

நீட் தேர்வு எழுதச் செல்லும் மாணவர்களுக்கு பல்வேறு கட்டுப்பாடுகள் விதிக்கப்படுகிறது. தமிழகம் முழுவதும் நீட் தேர்வுக்கு எதிர்ப்புகள் எழுகின்றபோதும், மத்திய அரசு தனது முடிவிலிருந்து பின் வாங்கவில்லை. நீட் தேர்வினால் கடுமையான மன உளைச்சலுக்கு ஆளாகி, அனிதா உட்படப் பலர் தற்கொலை செய்து கொண்டனர்.

இந்த சூழலில் நீட் தேர்வைத் தமிழக மாணவர்கள் எதிர்கொள்ளத் தமிழக அரசு மாணவர்களுக்குப் பயிற்சி அளித்து வருகிறது. நீட், பொறியியல், தொழில்நுட்ப படிப்புகளுக்கான நுழைவுத்தேர்வுகளில் அரசு மற்றும் அரசு உதவிபெறும் பள்ளிகளைச் சேர்ந்த மாணவர்களுக்குத் தனியாக மையங்கள் அமைத்து பயிற்சிகளை செப். 24ஆம் தேதி தொடங்கியது.

காலாண்டு விடுமுறையை முன்னிட்டு, இந்த பயிற்சிகள் நேற்றுத் தொடங்கப்பட்டுள்ளது. பிளஸ் 2 மாணவர்களுக்கு இந்த பயிற்சி வகுப்புகள் தொடர்ந்து 5 நாட்கள் அளிக்கப்படுகிறது. பெரும்பாலும், இப்போது அரசுப் பள்ளி விடுமுறை நாட்களில் இந்த பயிற்சிகள் வழங்கத் திட்டமிடப்பட்டுள்ளது.

தமிழக அரசு, கடந்த ஆண்டு தனியார் பயிற்சி மையங்களின் உதவியுடன் மாணவர்களுக்குப் பயிற்சி வழங்கி வந்த நிலையில், இப்போது அரசுப் பள்ளி ஆசிரியர்கள் மூலம் பயிற்சிகளை வழங்குகிறது.

ஆங்கில வழியில் தேர்வை எதிர்கொள்ள விரும்பும் மாணவர்களுக்கு, ராஜஸ்தான் மாநிலத்தைச் சேர்ந்த ‘ஏடுஸ் இந்தியா’என்ற நிறுவனத்தில் உதவியுடன் தொழில்நுட்ப வழியாக, அரசுப் பள்ளி ஆசிரியர்களைக் கொண்டு பயிற்சி வழங்கப்படுகிறது.

இந்த முறையில் மாணவர்களுக்குப் பயிற்சி வழங்க, மாவட்டந்தோறும் 10 அரசுப் பள்ளி ஆசிரியர்கள் தேர்வு செய்யப்பட்டு, அவர்களுக்குச் சிறப்புப் பயிற்சி முன்பே வழங்கப்பட்டது.