ஆப்நகரம்

சாத்தான்குளம் காவலர்கள் கூண்டோடு மாற்றம்; புதிய காவலர்கள் நியமனம்!

தூத்துக்குடி மாவட்டம் சாத்தான்குளம் காவல் நிலையத்துக்கு 27 காவலர்கள் புதிதாக நியமிக்கப்பட்டுள்ளனர்

Samayam Tamil 29 Jun 2020, 5:02 pm
துாத்துக்குடி மாவட்டம் சாத்தான்குளத்தை சேர்ந்த தந்தை மகனின் மரணம் தமிழகம் முழுவதும் பெறும் பரபரப்பை ஏற்படுத்தியுள்ளது. காவல் நிலையத்தில் கடுமையாக தாக்கப்பட்டதால் தான் இருவரும் அடுத்தடுத்து உயிரிழந்ததாக குற்றம் சாட்டப்படுகிறது. தமிழகம் முழுவதும் கடும் அதிர்வலைகளை ஏற்படுத்திய இந்த விவகாரம் தொடர்பாக சாத்தான்குளம் காவல் ஆய்வாளர் ஸ்ரீதரும், காவல் உதவி ஆய்வாளர்கள் 2 பேரும் பணியிடை நீக்கம் செய்யப்படுள்ளனர். இதனைத்தொடர்ந்து, சாத்தான்குளம் காவல் நிலைய ஆய்வாளராக வடசேரி காவல் நிலைய ஆய்வாளர் பெர்னார்டு சேவியர் நியமிக்கப்பட்டார்.
Samayam Tamil சாத்தான்குளம் காவல் நிலையம்
சாத்தான்குளம் காவல் நிலையம்


சாத்தான்குளம் விவகாரத்தை தாமாக முன் வந்து வழக்கு பதிவு செய்து விசாரணை மேற்கொண்டு வரும் உயர் நீதிமன்ற மதுரை கிளை, கோவில்பட்டி மாஜிஸ்ட்ரேட்டு பாரதிதாசன், சாத்தான்குளத்தில் தங்கியிருந்து சாட்சிகளிடமும், கோவில்பட்டி கிளைச் சிறையிலும் நேரடியாக விசாரணை நடத்த அதிரடி உத்தரவு பிறப்பித்தது.

ஆனால், சாத்தான்குளம் காவலர்கள் விசாரணைக்கு ஒத்துழைக்காததால், சாத்தான்குளம் காவல்நிலையத்தை வருவாய் துறை அதிகாரிகள் கட்டுப்பாட்டில் கொண்டுவர உயர்நீதிமன்ற மதுரைக் கிளை உத்தரவிட்டது. சாத்தான்குளம் காவல்நிலையத்துக்கு வருவாய்த்துறை அதிகாரியை பொறுப்பாக நியமிக்கவும் நீதிமன்றம் உத்தரவிட்டது. மேலும், தடயவியல் துறை அதிகாரிகள் சாத்தான்குளம் காவல்நிலையத்திற்கு சென்று அங்குள்ள தடயங்களை சேகரிக்க வேண்டும் எனவும் நீதிமன்றம் உத்தரவிட்டுள்ளது.

தந்தை மகன் வழக்கு: சிபிஐக்கு மாற்றி உத்தரவிட்ட நீதிபதிகள்!

இந்த நிலையில், சாத்தான்குளம் காவல்நிலையத்திற்கு சிறப்பு உதவி ஆய்வாளர் உட்பட 27 பேரை புதிதாக நியமனம் செய்து மாவட்ட காவல் கண்கானிப்பாளர் அருண் பாலகோபாலன் உத்தரவிட்டுள்ளார். அதன்படி, சிறப்பு உதவி ஆய்வாளர், தலைமைக்காவலர், காவலர்கள் உட்பட 27 பேர் சாத்தான்குளம் காவல் நிலையத்துக்கு புதிதாக நியமிக்கப்பட்டுள்ளனர்.

முன்னதாக, தமிழ்நாடு முதல்வர் எடப்பாடி பழனிசாமி நீதிமன்றத்தின் அனுமதி பெற்று இந்த வழக்கு சிபிஐ விசாரணைக்கு மாற்றப்படும் என அறிவித்த நிலையில், அதற்கு நீதிமன்றம் அனுமதி அளித்துள்ளது என்பது குறிப்பிடத்தக்கது.

அடுத்த செய்தி