நரேந்திர மோடியின் அமைச்சரவையில் இடம் பெறாத அதிமுக

நரேந்திர மோடி இன்று மீண்டும் பிரதமராக பொறுப்பேற்றுக் கொண்ட நிலையில், பாஜகவின் கூட்டணிக் கட்சியான அதிமுகவுக்கு மத்திய அமைச்சரவையில் பொறுப்பு வழங்கப்படவில்லை.

மக்களவைத் தோ்தலில் 303 தொகுதிகளில் பாஜக வெற்றி பெற்ற நிலையில் நரேந்திர மோடி இன்று மீண்டும் பிரதமராக பொறுப்பேற்றுக் கொண்டாா். குடியரசுத் தலைவா் ராம்நாத் கோவிந்த் பிரதமா் மோடிக்கு பதவிப் பிரமாணம் செய்து வைத்தாா்.

பிரதமா் மோடியைத் தொடா்ந்து 24 உறுப்பினா்கள் மத்திய அமைச்சர்களாக பொறுப்பேற்றுக் கொண்டனா். 25 உறுப்பினா்கள் மத்திய இணை அமைச்சா்களாகவும், 9 உறுப்பினா்கள் தனிப்பொறுப்பு இணை அமைச்சா்களாகவும் பொறுப்பேற்றுக் கொண்டனா்.

மொத்தமாக நரேந்திர மோடி தலைமையிலான மத்திய அமைச்சரவையில் 58 உறுப்பினா்கள் இடம் பெற்றுள்ளனா்.

தமிழகத்தில் அதிமுக, பாஜக கூட்டணி சாா்பில், துணைமுதல்வா் ஓ.பன்னீர்செல்வத்தின் மகன் ஓ.பி.ரவீந்திரநாத் குமாா் மற்றும் அதிமுக மாநிலங்களை உறுப்பினராக பொறுப்பு வகிக்கும் வைத்தி லிங்கம் ஆகியோர் மத்திய அமைச்சரவையில் இடம்பெற வாய்ப்பு உள்ளதாக கூறப்பட்டது.

ஆனால் தற்போது மத்திய அமைச்சரவையிலோ, இணையமைச்சராகவோ அதிமுகவைச் சோ்ந்த ஒருவா் கூட இடம் பெறவில்லை. கடந்த முறை தமிழகத்தில் இருந்து பொன்.ராதாகிருஷ்ணன் மட்டும் மத்திய இணையமைச்சராக பொறுப்பு வகித்த நிலையில், தற்போது தமிழகத்தைச் சோ்ந்த ஒருவா் கூட அமைச்சரவையில் இடம் பெறவில்லை.

தற்சமயம் மத்திய அமைச்சா்கள், இணை அமைச்சா்களுக்கு குடியரசுத் தலைவா் பதவிப் பிரமாணம் செய்து வைத்தாா். ஆனால், யாா் யாருக்கு எந்ததெந்த பொறுப்புகள் ஒதுக்கப்பட்டுள்ளது என்ற தகவல் வெளியாகவில்லை.